A parroquia de Berdoias conserva os libros de bautizados dende 1607
O historiador Xosé Mª Lema documentou os seus apelidos dende o século XVII // Romar é un toponímico orixinario da aldea vimiancesa, a única con ese nome
Berdoias é unha das 14 parroquias de Vimianzo, berce de importantes figuras da fidalguía galega, e a única que ten documentados os seus apelidos dende o século XVII grazas á laboura do historiador vimiancés e presidente do Seminario de Estudos Comarcais da Costa da Morte, Xosé María Lema, e tamén a que é unha das poucas que conservou os libros de bautizados dende 1607 (actualmente depositados no Arquivo Diocesano de Santiago).
Lema Suárez recopilou as súas investigacións nun libro que recolle os apelidos de Berdoias dende 1600 ao 2000, e o pasado mes de outubro presentou o estudo Os primeiros apelidos documentados dunha parroquia galega: Berdoias (séc. XVII) no marco do Simposio de Antroponimia promovido polo Instituto da Lingua Galega da USC. Un traballo que deu a coñecer tamén na fin de semana aos propios veciños e veciñas de Berdoias, nun acto celebrado na escola local ao que asistiron unhas sesenta persoas.
Más información en El Correo Gallego (edición papel) y en Orbyt