O alcalde de Ames subliña a colaboración coa Xunta

Ames. Despois da reunión mantida entre o alcalde de Ames, Carlos Fernández, e o secretario xeral da Consellería de Educación e Ordenación Universitaria, Jesús Oitavén, o rexedor municipal destacou onte o elevado grao de colaboración mantido entre a Xunta e o Concello de Ames que permitiu desbloquear dous temas de suma importancia para a comunidade educativa amiense como son a adxudicación provisional da construción do novo IES do Milladoiro e a oferta dunha parcela nesta mesma localidade para construír un novo colexio de educación infantil e primaria.

A Consellería de Educación adxudicou de xeito provisional á empresa Dragados a construción do IES do Milladoiro por un importe que supera os 5,3 millóns de euros. Segundo explicou o rexedor "vaise a construír un instituto que estará moi ben dotado xa que contará con 16 unidades de ESO e 3 de Bacharelato. Poderíamos cualificalo dun institutazo. Ademais terá unha arquitectura moi cualificada e adaptada ás necesidades do alumando e do profesorado". Fernández destacou a "gran colaboración" entre Concello e Xunta, neste caso con Educación, para seguir executando grandes proxectos.

O alcalde, sen embargo, mostrouse contrariado pola postura do voceiro do PP de Ames, Santiago Amor, cada vez que se consegue un acordo coa Xunta. "Unha vez máis o señor Amor o que fai é coller unha rabieta. Animoo a que se interese máis polos intereses dos veciños e pense menos nas próximas eleccións municipais do mes de maio", manifestou.