O PP de Ames volveu rexeitar no pleno de onte, ó que acudiron unhas 50 persoas da Plataforma do Lixo, dar marcha atrás á súa decisión de cobrarlles ós veciños a taxa da recollida con carácter retroactivo dende o ano 2009. Un dos portavoces do colectivo veciñal, Manuel Lens, recoñecía este venres en Radio Obradoiro que están "decepcionados, pero non sorprendidos" coa postura do equipo de Santiago Amor.

Segundo Lens, o executivo local "insiste en que ten que cobrar a taxa con carácter retroactivo por imperativo legal, porque non lle queda outro remedio. Din que é unha situación herdada, e que non atopan un motivo legal para botar atrás eso". O portavoz da plataforma afirma que "lles ofrecemos alternativas, feitas por alguén de renome que conclúe que o cobro retroactivo é ilegal, pero danos a sensación de que non teñen ningunha vontade de solucionar o problema".

Neste sentido, Lens dixo que lle trasladaron esas alternativas ó goberno na reunión que mantiveron as dúas partes o pasado luns, se ben admitiu que non lle levaron ningún informe "porque eso é cousa do concello". Ó seu xuízo, "o proceso vai para longo, e non imos dar o brazo a torcer. Levaremos o asunto ata as súas últimas consecuencias, e non descartamos chegar ó contencioso-administrativo".

Na reunión do luns, segundo confirmou Lens, "quedaron de darlle unha segunda volta ó tema, así que o normal sería que se puxeran en contacto con nos". Asegura que a plataforma ten "un calendario a medio facer, e agora quédanos por definir as accións que imos levar a cabo".