Pilar Farjas priorizará o ambulatorio para Melide

Melide. A alcaldesa de Melide, Ánxeles Vázquez, acompañada da concelleira de Cultura, Deportes e Normalización Lingüística, Dolores Gómez, reuníuse o pasado xoves coa conselleira de Sanidade, Pilar Farjas, para estudar as condicións de cara á construcción dun novo centro de saúde en Melide.

Esta é xa unha vella demanda dos veciños deste municipio, que se leva reclamando dende hai moitos anos. Ademais dos problemas polo número de pacientes en comparación co número de medios, cabe engadir o mal estado das instalacións do centro de saúde melidá.

O anterior goberno, dirixido pola nacionalista Socorro Cea, xa mantivera reunións tanto co anterior Bipartito da Xunta como coa actual Consellería de Sanidade para conseguir unhas dependencias sanitarias de maior calidade. Outra das peticións máis reiteradas foi a ampliación do consultorio de Melide, co correspondente aumento de especialidades.

Ao fío disto, a actual alcaldesa, Ánxeles Vázquez, sinalou no seu encontro con Pilar Farjas a posibilidade de que o centro de saúde teña acceso a un retinógrafo, un aparello médico co que se pode detectar doenzas de gran risco para a saúde como a diabete e a hipertensión. Do mesmo xeito, no antigo centro xa se levan a cabo probas médicas que antes non se executaban, como é o caso do servizo de citoloxías.

Pilar Farjas avalou o proxecto e instou á alcaldesa de Melide a que se comezara coa maior celeridade os trámites de cesión dos terreos.