O Concello de Teo e a Fundación Preescolar na Casa desenvolverán de novo o seu programa educativo de apoio ás familias a partir do mes de febreiro. Esta actividade é totalmente de balde para os participantes e está dirixida a pais e nais con nenos/a de entre cero e tres anos, e pódese asistir a este programa de formación tanto se os cativos/as van a unha escola infantil coma se non xa que se traballa sobre todo na formación dos proxenitores.
As persoas interesadas en participar nesta actividade xa poden entregar a ficha de inscrición nas oficinas do Concello antes do 14 de febreiro, cando está previsto que comecen as reunións. A ficha, que debe entregarse no Rexistro Xeral do Concello, xa se pode recoller nas oficinas municipais ou descargar aquí
Segundo indican dende o departamento municipal de Educación, dirixido por María Álvarez Garea, no caso de haber máis solicitudes ca prazas, atenderase a orde de inscrición. Está previsto que a primeira reunión sexa o 14 de febreiro na Casa Común dos Tilos. As xuntanzas serán en martes alternos e haberá dous grupos segundo os intereses dos participantes, ás doce da mañá e ás seis da tarde. Preescolar na Casa consiste en reunións quincenais entre os pais, nais e nenos/as participantes acompañados dunha orientadora, nas que se comparten dúbidas e experiencias coas outras familias, facendo actividades axeitadas a cada idade como xogos, cancións ou contos.
María Álvarez, edil de Educación, destaca o importante traballo da Fundación Preescolar na Casa. E como xa defendeu nunha moción debatida en pleno no Concello de apoio a este traballo destaca que este programa educativo leva trinta anos funcionando en toda Galicia, atendendo nestes anos a preto de 30.000 familias e servindo de acompañamento ó labor educativo familiar así como sendo unha importante axuda para resolver calquera dúbida que se presente na educación dos fillos e fillas.
Descarga aquí a ficha de inscrición
RSS
