"Teatrofilia ofrecerá un pasarrúas no que emularemos a Cunqueiro"

Membros da Asociación Papaventos no local onde ensaian FOTO: Formoso

O teatro voltará ser o grande protagonista a partires de hoxe, e até o próximo catro de abril, en Vedra. A sexta edición do festival Teatrofilia, organizada pola Asociación Cultural Papaventos, comezará esta noite, ás 21.15 horas, coa posta en escea da obra do grupo Andaravía Teatro, Anacos de Nós. O programa, que se extenderá durante catro fins de semana, contará con sorpresas, tardes adicadas aos cativos e máxicos pasarrúas pola capital municipal. A presidenta de Papaventos, Sonia Balado, e outros dous membros da agrupación, María Gaiteiro e Antonio Turnes concretan máis detalles sobre as novidades deste ano.

_ ¿Con que obxectivos naceu o festival de teatro amador Teatrofilia?

_ Os principios orixinais do festival, que se creou hai seis anos, baseáronse, en primeiro lugar, en que queriamos que en Vedra se vise e practicase teatro, e que os veciños tiveran un sitio digno onde velo e que o teatro afeccionado tivera medios para actuar. Porén, por aquel entón, en Vedra había unha programación cultural escasa e con Teatrofilia tentamos cubrir ese oco.

_ ¿Como foi a evolución durante estes anos do festival?

_ A asistencia foi aumentando cos anos e cremos que xa é unha cita consolidada no municipio. Pouco a pouco, fomos conseguindo un público fiel, sen os que non sería posible desenvolver este festival. Aínda así, este ano fixemos unha especie de sketch para publicitalo nos bares, sobre todo entre a xente xoven do noso concello. Esperamos que este ano pasen por Teatrofilia arredor de 16.000 persoas.

_ ¿Cales son as principais novidades desta sexta edición?

_ Hai varias novidades e tamén haberá sorpresas. Por exemplo, a agrupación profesional que ven convidada este ano é Os Quinquilláns, que representarán a obra Mago de Oz. Coma novidade no cartel, acudirá unha agrupación do norte de Portugal, Os Madrioes. Teatrofilia tamén ofrecerá un pasarrúas, no que emularemos o mundo máxico de Álvaro Cunqueiro. Sairemos da casa da Irmandade, que é onde facemos os ensaios, e finalizará na casa da terceira idade. Porén, actuará o grupo Airiños de Rianxo, que é a agrupación máis antiga de Galicia, fundada hai xa setenta e cinco anos polos curmáns de Castelao. Tamén teremos, coma en outras edicións, a tarde adicada aos cativos, e outra xornada na que actuarán os grupos de teatro amador que hai no municipio.

_ 'Anacos de nós' será a obra coa que se inaugure o festival, ¿que se ofrece nesta representación?

_ Esta é unha obra moi intimista que se representará por primeira vez en Teatrofilia, aínda que xa a puxemos en escea noutras ocasións. É a terceira vez que se representa no concello de Vedra. Realmente, é un estriptis emocional de nós mesmos. En definitiva, sacamos todas as nosas miserias ante o público.

. sformoso@elcorreogallego.es