Pastor Rodríguez: “Non é de recibo que se derruben vivendas con informes favorables”

O alcalde do Son, o socialista Xoán Pastor Rodríguez Santamaría, no coñecido mirador da Atalaia

_ Cales son os retos máis importantes a acometer de cara ao futuro de Porto do Son?

_ En primeiro lugar desatascar o que xa estaba encauzado e que por varias razóns se demorou innecesariamente. Sacar adiante a piscina, que xa se vai comezar axiña; a recuperación das bandeiras azuis para as nosas praias, que nunca se deberon perder, ou a inauguración da nova casa de cultura de Portosín no próximo verán. A remodelación da fachada marítima do Son, que se retrasou caprichosamente polo señor Tomé, ex alcalde e portavoz do PP, e que vai ter gravísimas consecuencias para os veciños do casco urbano, e solucionar a ubicación do Punto Limpo.

_ Algún proxecto máis?

_ Continuar coas conversas para lograr o polígono industrial; acelerar a tramitación do PXOM, que levaba un ritmo demasiado lento; o Plan Especial do Castro de Baroña, conseguindo os terreos para o futuro centro de interpretación e, dunha vez por todas sacar a diante a casa de cultura de Xuño.

_ Que balance fai da súa xestión no Concello nestes case catro meses que leva ao frente?

_ Positiva. Estase traballando moito, pero hai cousas que necesitan tempo e colaboración doutras institucións como a Xunta, que non debe guiarse por criteiros partidistas. Logrouse buscar unha nova ubicación á depuradora de Tarrío, lonxe das vivendas, que vai sanear as parroquias de Baroña e Queiruga, e o compromiso da Deputación para financiar a piscina. Unha mellor e máis democrática atención aos veciños e estabilidade no goberno ao ter maioría no pleno.

_ Como son as relacións cos seus socios de goberno do BNG?

_ Boas. Hai o natural intercambio de opinións, lóxico en Democracia, pero o entendemento en xeral é bo. O traballo diario une e esquécense as diferenzas partidistas no beneficio do Concello._ Que pasa coa remodelación do borde litoral portuario?

_ No Concello non hai documentación que comunique que está parada esta obra. Será Portos de Galicia quen terá que aclarar por qué non se está executando e qué vai pasar con esta inversión para o Son. Hai un acordo plenario onde todos os grupos políticos votamos a favor da obra, e que eu saiba, ese é o maior órgano de decisión do Concello; se alguén pola súa conta solicitou algunha modificación, terá que explicarlle iso aos veciños.

_ En que situación se atopa actualmente a redacción do PXOM?

_ Relativamente avanzada, pensamos que pode estar o primeiro borrador en maio deste ano. Aprobar un PXOM esixe moitos trámites, pero agardamos telo aprobado nesta lexislatura; isto non depende de nós só, depende tamén da Xunta, das modificacións da Lei do Solo. Non é de recibo o actual clima de inseguridade xurídica dos nosos veciños que vén como vivendas con informes favorables de técnicos municipais son derrubadas por sentenzas xurídicas. E o partido que promulgou e reformou a lei até en tres ocasións e gobernou Galicia máis de 16 anos ten moita responsabilidade.

delegnoia@elcorreogallego.es