Viernes 26.12.2008
Hemeroteca web
|
RSS
 |
| José Manuel Pose, á esquerda, Francisco Javier Losada, Fernando Blanco, José María Seijas, Pere Llorens e José Venegas Alonso, onte FOTO: H. B. |
"Este Nadal será menos Nadal e este feito tense que asumir con crueza ¿Canto tempo poderemos aguantar?", preguntábase onte o presidente da Confederación Española de Comercio, Pere Llorens, no acto inaugural do VI Congreso do Comercio Galego, organizado pola Federación Galega de Comercio en colaboración coa Consellería de Innovación e Industria, a Secretaría Xeral de Política Lingüística, a S.A. de Xestión do Xacobeo e Caixa Galicia, no Palexco, da Coruña.
O conselleiro de Innovación e Industria, Fernando Blanco, acompañado polo devandito directivo, e polo alcalde da Coruña, Francisco Javier Losada de Aspiazu, o subdelegado do Goberno, José Manuel Pose, o presidente da Federación Galega de Comercio, José María Seijas e o director xeral adxunto de Caixa Galicia, José Venegas Alonso, inaugurou o congreso no que se deron cita máis de trescentos representantes do sector comercial de España e Portugal.
Na oportunidade Seijas, que actuou como anfitrión, recordou que a crise "só en Galicia provocou un descenso das vendas que se sitúa en torno ao 25% e máis de medio millar de peches de establecementos nos últimos meses". Asemade, dixo que "desde as nosas organizacións solicitamos medidas que pasan pola redución de impostos, por garantir a concesión de créditos e por adaptar os programas de axudas ao comercio".
Máis adiante, o representante galego dun sector conformado, na nosa comunidade, por 65.000 establecementos, con 134.000 traballadores, que é o 13 por cento do Produto Interior Bruto (PBI), valorou os pasos dados da man de Innovación e Industria, subliñando o plan cuadrienal de modernización con liñas de axuda moi favorables para o sector, e a Lei de horarios comerciais, entre outras actuacións.
Nesa liña, Pere Llorens solicitou confianza a Administración pública no sistema económico e nas empresas: "Necesitamos urxentemente aprazar os compromisos fiscais, se non se rebaixan os impostos directos e das cotizacións á Seguridade Social a cambio de non destruír postos de traballo. Necesitamos que as axudas á banca estean vinculadas ao crédito ás empresas, a financiar o circulante e o investimento. En caso contrario, estaríase premiando ós que non fixeron ben as cousas".
Explicou paralelamente, que o sector espera "respostas e apoios", malia que "non buscamos proteccionismos nin falsos paternalismos, só necesitamos que se nos atenda polo que somos, o primeiro empregador e o maior xerador de benestar e cohesión social que ningún outro sector económico".
Innovación incrementa os orzamentos
Segundo Fernando Blanco, a Consellería de Innovación e Industria daralle prioridade ó investimento real en materia de comercio, incrementando os seus orzamentos para 2009 nun 16% en relación con 2008, ata alcanzar os 34,3 millones de euros.
O conselleiro engadiu que se reforzarán as actuacións directas en promoción e animación comercial, e se destinará 28,4 millones de euros a axudas ao pequeno comercio -un 12% máis que en 2008-.
Ampliarase a liña de subvencións para a realización de reformas dos establecementos comercias e para a adquisición de mobles e equipamento comercial a todos os comercios. Asemade, Fernando Blanco subliñou que a consellería porá en marcha unha plataforma en internet para o comercio galego denominada mercadogalego.eu.
Anunciou que o anteproxecto de lei de ordenación do comercio interior de Galicia, está no seus últimos trámites administrativos para ser remitido ao Parlamento .
Xogador
Tras a apertura oficial, tiveron lugar as conferencias dos prestixiosos profesionais convocados pola federación Galega de Comercio. Arrincou Juan Antonio Corbalán, presidente de Makeateam e coñecido popularmente por ser considerado o xogador co mellor palmarés individual da historia do baloncesto español.
Equipo
Corbalán falou da figura do líder, cuxo obxectivo principal debe estar enfocado sempre cara ao beneficio do equipo e o seu máximo desenvolvemento como tal.
Mañá
A continuación foi a vez de Enric Pujadas, presidente do Grupo Bassat Ogilvy, que falou de: A revolución da comunicación publicitaria: a dixitalización, e rematou o ciclo da mañán José Ramón García, presidente executivo de Blusens, que expuxo: Blusens, a viaxe de emprender. Da nada á internacionalización en só cinco anos.
Tarde
Pola tarde falaron Emilio Duró -quen impartiu a conferencia: O coeficiente do optimismo: a mellor forma de sobrevivir en tempos de crise-, e Félix Cuesta -cuxa ponencia foi: A calidade no servizo: estratexia competitiva de orientación ao cliente- .
Grandes valores e moito optimismo
As autoridades que presidiron o acto inaugural do VI Congreso do Comercio Galego coincidiron en remarcar os valores do comercio retallista, a súa importancia nas sociedades e tamén en pedir unha grande dose de optimismo ao mesmo.
Os parabéns por elixiren A Coruña
Outra das coincidencias foi a felicitación dos oradores á federación Galega de Comercio por apostar polo futuro, e tamén por ter elixido A Coruña como sede, os máis empeñados nisto foron Francisco Losada e José Manuel Pose .
