Miércoles 28.01.2009
Hemeroteca web
|
RSS
Galicia » Axenda municipal » Concello de Lugo
O presidente provincial do PP, Xosé Manuel Barreiro, expresou onte a súa "sorpresa" pola decisión da Fiscalía da Audiencia de Lugo de solicitar información vinculada a un enxeñeiro imputado na operación Muralla referida exclusivamente á etapa de goberno popular no consistorio lucense.
O enxeñeiro Luis María Álvarez, imputado nesta operación, posta en marcha pola Fiscalía de Lugo, ó mando da cal está Jesús Izaguirre, por presuntas irregularidades na tramitación de expedientes de obras na Deputación de Lugo, traballou no Concello de Lugo, o que levou o fiscal a requirir documentación relacionada con este traballador.
A "sorpresa" no PP débese, dixo Xosé Manuel Barreiro, a que só se pide información do período comprendido entre 1996 e 1999, etapa na que gobernou o alcalde "popular" Joaquín María García Díez, e non ós dous anos nos que os "populares" aseguran que este traballador estivo no Concello co socialista Xosé López Orozco á fronte da alcaldía.
"Ó Partido Popular chámalle a atención que nesta investigación de presuntas irregularidades se acurte o período de análise ós expedientes de adxudicación de obras, cando resulta que estivo no Concello ata o 2001", apuntou Barreiro.
Barreiro expresou o desexo de que, polo ben das institucións afectadas e as persoas implicadas, a xustiza "esclareza o máis pronto posible esta investigación".
Segundo Barreiro, apréciase un "nerviosismo" nos socialistas, nerviosismo que relaciona coa "posibilidade de que García Díez encabece a candidatura" á alcaldía da cidade.
Barreiro tamén relaciona ese "nerviosismo" coas últimas informacións sobre adxudicacións de Augas de Galicia, cando era conselleiro, a unha das empresas investigadas por unha suposta fraude na concesión de obras da deputación.
O político popular negou tamén que o PP teña nada que ver con este proceso xudicial e coa investigación, polo que demandou a máxima "claridade" e "celeridade" nas investigacións. Verbo disto, insistiu en que isto se efectúe para que cando chegue a campaña electoral "os lucenses poidan confrontar os programas de cada unha das forzas políticas e poidan ver a solvencia de cada un dos candidatos".
Pola súa parte, o alcalde de Lugo, o socialista Xosé Clemente López Orozco, pediulles ós populares que non traten de lle botar culpas "a quen non as ten" e considerou "condenable" que se tente "culpabilizar" o PSOE polo feito de que no seu día denunciase publicamente supostas irregularidades no Servizo de Vías e Obras da Deputación de Lugo.
Orozco quixo deixar claro que ningunha das obras do Concello lucense que investiga a Fiscalía se refire á súa etapa como alcalde, e anunciou a intención de prestar "colaboración máxima" coa xustiza.
Apoio incondicional de Barreiro ó presidente provincial lucense
O presidente do PP de Lugo e vicepresidente do PP galego, Xosé Manuel Barreiro, non dubidou en darlle todo o seu apoio ó presidente da Deputación lucense, Francisco Cacharro Pardo.
Para Barreiro, Cacharro "é o responsable último do organismo, pero non dos supostos feitos delictuosos que poidan cometer uns funcionarios", polo que anunciou que o partido "non se vai mesturar", xa que a decisión de abandonar a presidencia do organismo provincial, "se existise, lle correspondería ó propio Cacharro".
Así, Barreiro non ve vinculación ningunha entre a operación Muralla e a "continuidade ou non" de Cacharro á fronte da Deputación. Non hai que esquecer que o propio Barreiro expresou as súas intencións de converterse no novo candidato popular ó ente. Neste sentido, negou calquera relación entre a operación xudicial aberta e a súa pugna con Cacharro pola candidatura á Deputación.
