O Concello de Os Blancos acorda pedir á Xunta que lle xestione os seus servizos

O Concello de Os Blancos (Ourense) acordou, co voto a favor do grupo de goberno --integrado polos catro edís de Alternativa Popular Galega (APG)-- e o rexeitamento dos populares, reclamar á Xunta que xestione os servizos mínimos que está obrigado a prestar e dos que non pode facerse cargo debido á difícil situación das arcas municipais.

En declaracións a Europa Press, o alcalde desta localidade ourensana, José Manuel Castro, explicou que o custo dos servizos a dispensa dos cales demandará o
goberno galego pode alcanzar "entre 120.000 e 150.000 euros", aínda que o secretario municipal está a realizar o estudio económico co fin de concretar a cantidade con total exactitude.

A maior parte deste montante procedería da iluminación pública, que a este municipio ourensano de apenas mil habitantes lle custa 80.000 euros cada ano. Ademais, neste paquete para o que o concello planea pedir a 'dispensa' amparado pola Lei de Bases de Réxime Local, tamén incluiría o acondicionamento e limpeza das vías públicas.

En canto ao momento no que formalizarán ante a Xunta esta petición, o rexedor apuntou que se fará "canto antes" e aludiu como data de referencia ao próximo mércores 18 de xullo.

Convocado por vía extraordinaria para este luns, o pleno de Os Blancos adoptou, cos votos a favor do grupo de goberno, unha resolución que, segundo esgrimiu Castro, resulta "fundamental" para os veciños deste municipio, cun presuposto anual que rolda os 600.000 euros e unha débeda que supera os 3 millóns.

De feito, Os Blancos xa tratou de acollerse ao aprazamento da débeda coa aprobación dun plan de axuste que foi rexeitado polo Ministerio de Hacienda no primeiro dos prazos dados e, posteriormente, xa non o volveu presentar porque, segundo alegou o alcalde, non había ningunha outra partida da que se puidese recortar.

"QUE A XUNTA ACEPTE"

"No concello vivimos persoas que esperamos ter servizos mínimos", manifestou José Manuel Castro, quen asegurou non se sentir "afectado" polo paso dado este luns polo pleno, convencido de que é "o que ten que facer" ante a difícil situación das arcas locais.

"Somos pioneiros e esperamos que a Xunta acepte", proclamou, para engadir que, malia a "reticencia" que esta mostrou ata o momento, alegando "que non ten competencias", confía en que o Executivo galego "mostre un pouco de sensibilidade" cara á problemática e acceda a prestar servizos que necesitan os veciños.

SUSPENSION DE NOMINAS

Castro chegou a formularse, no pasado mes de maio, a suspensión do pagamento das nóminas debido á falta de liquidez das arcas municipais, que teñen "retida" a súa participación nos ingresos do Estado dende hai máis de dous anos.

Finalmente, o Concello ingresou no mes de xuño os salarios correspondentes ao mes anterior despois de recibir unha subvención de 20.000 euros que tiña atrasada e que se correspondía co posto de Grumir estable, que conta con tres traballadores.

Esta partida correspondíase co diñeiro que ingresou a Consellería de Medio Rural, que ascendía a 1,15 millóns de euros en toda Galicia, para afrontar os gastos de 2011 derivados do mantemento dos Grupos Municipais de Intervención Rápida (Grumir), que adiantaran os concellos.