Lunes 01.02.2010
Hemeroteca web
|
RSS
RSS
|
 |
| Alumnado da Escola Universitaria de Deseño Industrial de Ferrol, pertencente á Universidade da Coruña, realizando prácticas nas instalacións do centro |
A universidade busca coa inmersión no Espazo Europeo de Educación Superior non só adoptar unha estrutura de estudos compartida por máis de 40 países. O proceso estase a aproveitar tamén para adecuar mellor a súa oferta ás necesidades do mercado laboral, pero o punto de partida non é tan cru como dan a entender os tópicos sobre a fractura entre mercado e unha universidade demasiado teórica e centrada en coñecementos que non se chegan a aplicar. Polo menos iso é o que parecen pensar os últimos titulados polo Sistema Universitario Galego (SUG): sete de cada dez consideran os coñecementos adquiridos durante o título bastante ou moi útiles no seu posto de traballo.
Esta é unha das conclusións do último Estudo da inserción laboral dos titulados no SUG 2005-2006, que acaba de presentar a Axencia para a Calidade do Sistema Universitario de Galicia (Acsug). O informe trata de facer unha radiografía exhaustiva da realidade laboral que atopan os titulados polas tres universidades galegas, co propósito de detectar puntos fortes e febles e contribuír a corrixir estes últimos no futuro.
 |
A percepción da utilidade dos coñecementos adquiridos durante os títulos non é a mesma para todas as ramas de coñecemento. Os titulados en artes e a humanidades, excepto as filoloxías, son os que presentan unha porcentaxe inferior, cun 60% de valoración alta. Porén, o dato é diferente ao do anterior estudo (do período 2003-2005), no que as proporcións máis baixas se atopaban nas ramas de enxeñería e arquitectura e os estudos de economía e empresariais.
A consideración que os titulados teñen por parte da empresa na que traballan, a súa integración nela, pode incidir de maneira directa sobre a satisfacción co posto de traballo. E de maneira global, a gran maioría dos egresados das universidades galegas síntense moi valorados nos seus postos de traballo. De novo arredor de sete de cada dez (o 72%) escolle esta resposta. A satisfacción máis alta dase na rama de artes e as humanidades, sen contar filoloxía, cun 85,7%.
Por enriba da media española
Todos estes datos poderían explicar a alta porcentaxe de titulados que, volvendo a vista atrás, volverían escoller o mesmo camiño que emprenderon ao matricularse nunha carreira. O 61% decantaríase exactamente polo mesmo itinerario, co mesmo título e na mesma institución. A proporción é superior á da media de toda España achegada polo estudo Reflex da Axencia Nacional de Avaliación e Acreditación (Aneca).
A maioría queda dentro de Galicia
A zona xeográfica é sen dúbida o aspecto do traballo co que os titulados dos campus galegos están máis satisfeitos. Segundo o último informe concluído da ACSUG, un 77,89% está contento co lugar no que traballa, unha porcentaxe que se eleva ata o 84,75% no caso dos egresados de ciencias da saúde. Esta alta satisfacción débese a que a maioría queda a traballar en Galicia (ver gráfico).
No momento no que se fixo a enquisa, a maioría, o 70%, estaba traballando, e tardou pouco máis de cinco meses de media en atopar o seu primeiro posto. Segundo responderon os máis de 5.300 consultados (o 52% dos egresados no curso 2005-2006), o empregador valorou sobre todo a súa disposición á mobilidade xeográfica, a actitude amosada durante a entrevista e súa experiencia laboral previa, de aí tamén que os ex estudantes valoren moi positivamente a experiencia das prácticas nas empresas .
Unha mostra de máis do 50 por cento
·· No curso 2005-2006 tituláronse polas tres universidades galegas 10.280 persoas. Máis da metade, 5.362, participaron en maio de 2008 no último informe concluído da Acsug sobre inserción laboral, a través de entrevistas telefónicas.
Unha radiografía ao servizo da mellora
·· Os informes da ACSUG sobre a inserción dos titulados galegos no mercado laboral tratan de realizar unha radiografía da universidade dende o seu punto de vista, detectando necesidades formativas e organizativas e contribuíndo á mellora .
