‘Typical’ gaiteiro de Betanzos en 1926. ¿Así nos ven en EEUU?

Adiviña, adiviñanza. Garda no peto allos contra os vampiros, no pescozo colga un amuleto contra o mal de ollo e ás costas porta un zurrón cheo de queixo e pan contra a fame. ¿Un británico cruzando a Transilvania do século XIX? Non: un forasteiro no Camiño de Santiago asesorado polas webs anglosaxonas. Porque máis alá do fenómeno Rosa Díez, a inventora do "galego no sentido pexorativo do termo", reluce o descoñecemento sobre a terra da festa rachada. Etnógrafos ingleses e norteamericanos definen ós galegos como "minoría celta dunha remota zona española". ¡Tócalle o sacho!

Un arquivo internauta como o de Faqs, que resposta ás preguntas máis frecuentes, regala esta perla no seu World Directory of Minorities: "Galicia está ocupada por celtas, que usan gaitas como os escoceses e no colexio aprenden poesía". A web define o noso territorio como "un dos máis pobres de España, a maioría dos homes vense obrigados a emigrar". Outras páxinas relatan historias en inglés para non durmir: "Dende os anos 80, houbo un bum nos prezos urbanísticos da costa". A web Faqs chega a compararnos con Irlanda: "A política é conservadora, aínda que cunha parte separatista e mesmo grupos que cometen actos violentos". Remata o conto dicindo que "as autoridades non aceptaron unha campaña para restaurar o galego como idioma respetado". ¡Mimá!

Seguro que Rosa Díez ten pesadelos estes días con muiñeiras e queimadas. O BNG acaba de pedir a súa reprobación no Parlamento de Galicia tralas polémicas declaracións da política sobre os galegos. Poida que a líder de UPyD aplaudise a seguinte definición do idioma galego en thefreedictionary.com: "The Portuguese dialect spoken in Galicia". Menos mal que Travelsignpost, célebre enlace de viaxes, conmemora a nosa gastronomía. Recomenda o noso lacón con grelos, descrito como unha bandexa de porco curado rodeado dunha ristra de chourizos.

Máis simpática é a percepción ofrecida por Everyculture.com, enciclopedia etnográfica do planeta Terra. Descendemos da segunda oleada da invasión celta en España. E hai "máis galegos en Argentina que na propia Galicia". ¡Así andan os políticos co voto emigrante! Everyculture.com tamén adica un espazo á lenda negra: "Dende os Reis Católicos, Galicia é unha das zonas máis empobrecidas do Noroeste". Segundo semellantes versión, ás mulleres só nos falta voar en escobas. Esta enciclopedia sinala que "os galegos (galicians) conviven entre supersticións e catolicismo". Atención á nosa indumentaria: levamos amuletos e realizamos rituais contra o mal de ollo (evil eye). Como non, temos citas coas meigas e as barajeiras para recibir pócimas de amor e saúde. Everyculture mesmo se torna bilingüe e recupera os nosos mellores ditos populares: "Eu non creo nas bruxas, pero habel-as hainas! I don´t believe in witches, but they exist!"(textualmente, en galego e inglés). Investigacións realizadas por Dana Facanos, Keith Lye ou Adrian Schubert sacan conclusións inimaxinables. Celebramos vodas e bautizos como símbolos de "ostentación e estatus". Usamos un "special term called morriña". E imos a peregrinaxes chamadas "romer'as". É dicir: vivimos nunha peli de Kusturika.

. phermida@elcorreogallego.es