Con 330 empregados na empresa principal, Navantia-Fene sobrevive construindo bloques para as fragatas de Ferrol. O último barco alzado en Perlío entregouse en 2003 e o veto productivo da UE impera ata 2015. O responsable do comité de empresa confía en que "España aproveite esta presidencia".

– ¿Por que deposita as súas esperanzas neste semestre?

– Porque as circunstancias serán favorables para un cambio. A través da presidencia española da UE teremos as facilidades para dar un paso máis contra o veto. E as circunstancias económicas da crise tamén servirán de pretexto para fortalecer o naval. Asistimos á situación doutros países da Unión Europea: teñen problemas na construcción naval porque a crise apreta e se cancelan contratos, ou tratan de estirarse para aguantar máis anos.

– ¿Poderá adiantarse o fin do veto no sector civil?

– Temos unha oportunidade única para adiantar ese horizonte. A iniciativa popular de Rumbo 21 tamén levou esa proposta ó Parlamento de Galicia, aínda que cun carácter máis político que de posibilidade. Necesitamos negociar nun intento de facilitar a contratación ante a pandemia da crise.

– Os tempos apremian...

– Vemos dificultades no futuro, non hai contratos novos e a partir de 2011 a carga de traballo descenderá. Só nos queda un ano para novos contratos. Xa remata a fase de corte e prearmamento dos buques, se non hai continuidade nos talleres teremos un gran baleiro. Pedimos esforzos do Goberno central para unha sexta fragata, un parche temporal para depois acadar contratos ambiciosos para a ría de Ferrol.