El Correo Gallego

Noticia 1 de 1 Galicia | galicia@elcorreogallego.es  |   RSS - Galicia RSS

Juan Casares Long: "Non teño ataduras, traballarei só para que a USC sexa recoñecida"

“Impulsarei unha serie de medidas para que o proceso de cambio sexa o máis fluído e rápido posible”

ECG   | 23.05.2010 
A- A+

Juan Casares Long (A Coruña, 1950) coincide co seu rival en que abordar o financiamento da USC coa Xunta será unha das súas primeiras medidas se mañá gaña as eleccións. No apartado das diferenzas entre un e o outro, o catedrático de Enxeñería Química subliña "o carácter plural" da súa candidatura e que as doce persoas que presenta como equipo son todas as que estarán se chega a vitoria. "Eu explicito o que o outro non explicita aínda", advirte o profesor.

¿Cal é a principal diferenza, ao seu xuízo, entre a súa candidatura e a do seu rival?

A experiencia, os anos que levo como a única voz alternativa na universidade. A presenza estes anos nos órganos de goberno axudáronme a coñecer ben cal é a situación da USC.

Se gaña as eleccións, ¿cal será a primeira medida que poña en marcha?

Falaría dun conxunto de accións, e a primeira sería integrarme na comisión que trata o plano de financiamento das universidades galegas. Se é posible, tamén convocarei o claustro antes das vacacións, xa que estamos fóra de prazo para adaptalo á LOMLOU. Impulsarei unha serie de medidas que tratarán de facer que o proceso de cambio sexa o máis fluído e o máis rápido posible.

Hai uns días dous deputados de BNG e de PSdeG pedían o voto progresita para o seu contrincante. Hai quen o ve como a opción conservadora, ¿como se definiría vostede?

Non teño ataduras nin condicionantes, síntome moi libre e penso que traballarei só para que a USC sexa recoñecida. A miña é unha candidatura aberta e plural, onde teñen cabida todas as sensibilidades.

Rodeouse dun equipo de doce persoas, á parte da secretaria xeral ¿non son demasiadas para os tempos de crise que vivimos?

Non, eu explicito o que o outro non explicita. Ademais, iso non quere dicir que nun momento determinado se hai que quitar ou poñer alguén se faga, pero agora mesmo é un equipo completo, para gobernar.

Facendo autocrítica, ¿en que debe mudar ou autocorrixirse a USC?

Temos que corrixir as asimetrías que existen entre campus, centros, departamentos e mesmo áreas de coñecemento, porque debemos garantir a mellor investigación e a mellor docencia.