En liberdade con cargos os seis detidos vinculados cunha trama de branqueo de capitais

As seis persoas detidas nas localidades pontevedresas de  Vilagarcía de Arousa e Cambados pola súa suposta vinculación cunha  trama de branqueo de capitais quedaron en liberdade con cargos,  segundo confirmaron a Europa Press fontes xudiciais.  
Entre os detidos no marco da denominada 'Operación Job',  desenvolvida dende primeira hora da mañá de onte, atópase coñecido  narcotraficante Roberto Leiro Santos, que xa foi detido como  responsable da organización de transportistas que pretendía  introducir en terra oito toneladas de cocaína que traía a bordo o  'South Sea', no maior alixo desta droga interceptado en Europa.  
Funcionarios da Axencia Tributaria en Galicia informaron de que os  detidos montaran unha trama de ocultación das ganancias procedentes  do narcotráfico en propiedades inmobiliarias e unha sociedade que  xestionaba varias tendas de deportes na provincia de Pontevedra.  ALTO STANDING  
As investigacións comezaron ante o "elevado" nivel de vida que  gozaban os membros da trama agora detidos que, "sen ingresos legais  que puidesen ser xustificados", detiñan propiedades inmobiliarias de  alto standing.  
Froito das investigacións desenvolvidas por Vixilancia Aduaneira  baixo a dirección do Xulgado de Instrución número 1 de Vilagarcía de  Arousa e da Fiscalía antidroga de Pontevedra descubríronse  propiedades por valor de 900.000 euros, entre elas "un chalé  suntuario" en Vilagarcía de Arousa.