A xeoloxía no Bacharelato

No Ano Internacional do Planeta Terra (2008), as autoridades educativas galegas eliminaron a Xeoloxía da lista de materias optativas de 2º de Bacharelato. Ata agora, o alumnado da modalidade de Ciencias podía escollela, pero os responsables de educación decidiron manter todas as materias que estaban, engadir algunhas novas (benvidas sexan) e eliminar sen máis a Xeoloxía. Dende estas páxinas pido unha rectificación e que se inclúa a Xeoloxía como unha optativa máis de 2º de Bacharelato, feito que non crea ningún prexuízo a ninguén mentres que a formación científica e o futuro deste país sairán gañando. Intentarei demostralo:

Galicia posúe un rico -e pouco coñecido- patrimonio xeolóxico de gran beleza e interese científico, froito da complexa historia xeolóxica de Galicia ao longo de millóns de anos, e cun importante valor como recurso natural, paisaxístico e económico.

Así o pregamento do Courel, as singulares e antigas rochas de cabo Ortegal, os cantís de Vixía Herbeira ou os granitos do Monte Pindo son obxecto de estudo por científicos do mundo enteiro. Na mesma liña, a variedade de rochas e minerais, a miúdo de interese económico e industrial, a materia prima da industria cerámica, a explotación das augas subterráneas, o aproveitamento recreativo-medicinal das augas termais ou o uso da enerxía xeotérmica e outras fontes renovables, con cada vez maior proxección futura, merecen ser coñecidos e gozados por todos, como merecen ser obxecto de investigación polos futuros científicos e científicas adicados ás ciencias xeolóxicas.

Por se isto non bastara, subliñamos que Galicia precisa dunha planificación e ordenación do territorio baseadas na sostibilidade, dunha explotación dos recursos naturais rendible á vez que conservacionista, na percura dun desenvolvemento económico non rifado co coidado do medio. Neste contexto, a realización de rigorosos estudos de impacto ambiental e a busca de solución a moitos dos problemas ambientais do país, precisan de profesionais da xeoloxía en colaboración cos doutras disciplinas. No mundo actual a maioría dos proxectos deben ser abarcados por equipos multidisciplinares, e no relativo ao medio natural a base de partida é a xeoloxía.

Galicia posúe tamén un rico patrimonio paleontolóxico aínda non suficientemente investigado. En Galicia atopamos numerosos indicios xeolóxicos útiles para comprender o clima do pasado e dese xeito poder afrontar o reto do cambio climático.

Galicia presenta un moderado perigo de padecer riscos xeolóxicos (sísmicos e outros), polo que profundizar no estudo do noso subsolo é imprescindible á hora de previr e adoptar medidas correctoras.

Galicia ten a honra de contar con insignes xeólogos de renome mundial como D. Isidro Parga Pondal e Galicia pode presumir da magnífica e singular colección de xeoloxía do Museo de Historia Natural Luis Iglesias da Universidade de Santiago.

A outra cara da moeda está na formación académica dos estudantes galegos: Galicia posúe tres universidades pero ningunha ten Facultade de Xeoloxía nin de Ciencias Ambientais e os responsables educativos van imposibilitar que os alumnos de Bacharelato acaden a formación xeolóxica que o o noso país merece e necesita.

*Catedrática de Bioloxía e Xeoloxía no IES nº1 de Ribeira e Coordinadora Galega de AEPECT