A USC estrea o voto electrónico nas vindeiras eleccións

A USC presentou onte o proxecto de e-voto para os vindeiros comicios FOTO: Santi Alvite

A Universidade de Santiago de Compostela vai desenvolver un Plan Piloto de Votación Electrónica durante as vindeiras Eleccións 2010. Concretamente, este plan aplicarase no proceso para a elección de representantes nos Consellos de Departamento. O proxecto piloto de-senvolverase en 55 departamentos da Universidade compostelá que se apuntaron para participar nesta experiencia.

O voto electrónico consistirá na emisión de sufraxios a través dun dispositivo telemático utilizando identificación electrónica. O sistema "permitirá a emisión de votos a través das redes de datos de forma totalmente segura", sinalou Carlos Gómez Otero, secretario xeral adxunto da USC.

Pola súa banda, a secretaria xeral da USC, Isabel García Rodeja, subliñou a importancia deste plan ao permitir acumular experiencia nun eido de grande complexidade na Universidade, pola cantidade de votantes chamados en cada proceso e pola diversidade de procesos electorais para os distintos órganos de representación universitarios, "cunha media de un proceso electoral anual", lembrou.

Antes de votar, o usuario terá que autenticarse mediante un sistema de usuario e contrasinal ou PIN que lle proporcionará a Universidade. Nalgúns casos, e para futuras experiencias, tamén poderán utilizarse certificados de sinatura avanzada. Logo accederase á plataforma de voto electrónico que presentará as distintas opcións de elección.

Con anterioridade a saír da aplicación de votación, aparecerá na pantalla un recibo de voto que se poderá imprimir permitindo comprobar que o voto sexa contabilizado cando se publiquen os resultados. En ningún caso será posible rastrexar o emitido a través deste xustificante.

O voto electrónico no proceso para a elección de representantes aos Consellos de Departamentos poderá realizarse no período de voto anticipado (os días 29 e 30 de abril ou o 3 de maio) e durante a xornada de votación establecida na convocatoria electoral, entre as 10:30 e as 18:30 horas.

O voto poderá emitirse dende calquera dispositivo conectado a internet, podendo habilitarse unha ou varias cabinas electrónicos nos propios centros da universidade compostelá. Os electores terán que conectarse a través da secretaria virtual ou a unha dirección electrónica.