Cursos fluviais de Galicia: o Mera

Despois de case 30 quilómetros de percorrido polos concellos coruñeses de As Pontes, As Somozas, Cerdido e Ortigueira, desemboca no Océano Atlántico formando a ría de Santa Marta de Ortigueira.

Este curso fluvial, que discorre fortemente encaixado en gran parte do seu percorrido,  atravesa paraxes de gran beleza na súa conca alta e media, con numerosas, intrincadas e inaccesibles fragas que conforman auténticos ecosistemas. Tanto o río como a súa desembocadura están declarados Lugar de Importancia Comunitaria e Zona de Especial Protección dos Valores Naturais. Ademais, a Ría de Ortigueira conta con outras figuras de protección como a de Zona Húmida Protexida, Zona de Especial Protección para as Aves e Zona Ramsar.

O Mera recibe augas de numerosos regatos, entre os cales o Pulgueira é o seu principal afluente. As especies que viven nas súas augas son a troita, o reo, a lamprea e a anguía. Nos últimos anos estase a detectar unha importante recuperación da súa riqueza solmoneira, que xa estaba dada por desaparecida. Trátase dun río moi interesante en canto ás posibilidades de pesca e conta cun único couto, o de Noval (concellos de Cerdido e Ortigueira), onde o reo é o rei indiscutible.

A existencia dunha central eléctrica en desuso na súa conca é un dos principais problemas deste curso fluvial, xa que impide a supervivencia de especies migratorias nas súas augas. Ademais, a proliferación de flora alóctona nas súas marxes pon en risco o seu ecosistema.

Ver: as Serras da Capelada e a Faladoira, ambas as dúas nas inmediacións deste curso fluvial, son dous dos espazos naturais que recomendamos visitar. Preto da primeira delas está o santuario de San Andrés de Teixido, ó que vai de morto quen non vai de vivo, que é outro dos atractivos desta zona desde o que se poden obter fermosas vistas dos acantilados deste tramo de costa e observar a fauna salvaxe, entre a que destacan os impoñentes cabalos. A propia Ría de Ortigueira é outra das nosas recomendacións, trátase dun espazo natural protexido no que se refuxian numerosas especies animais, principalmente, aves mariñas. As áreas recretivas a carón do Mera, como a de A Queiroga (As Somozas), a vila de Ortigueira (onde se celebra o famoso Festival Celta) ou as súas praias son outros dos lugares que merece a pena visitar.

Chegar: a estrada AC-101 é a mellor opción para chegar ata o nacemento deste río coruñés e á parte da súa conca media. Através da AC-862 accederemos ata a vila de Ortigueira e a desembocadura do Mera.

Comer: os peixes de río, como o reo, ou os produtos do mar, entre os que destacan as ameixas e os berberechos da ría, son os principais reclamos da gastronomía desta zona, xunto cos produtos da horta como o grelo de Cerdido, cuxa festa se celebra no mes de marzo, ou os pementos. No capítulo dos doces, o mel (cunha feira propia en Ortigueira) ou os postres típicos do Entroido, como as orellas ou os pestiños, son algúns dos seus máximos expoñentes.

Aloxamento: son bastante abundantes as casas de turismo rural e os hoteis e pensións das principais vilas da conca do río Mera, especialmente Ortigueira e Cerdido, que se converten nunha boa opción para facer noite na zona.