Miércoles 22.04.2009
Hemeroteca web
|
RSS
O director da Axencia Galega de Industrias Culturais (Agadic), Juan Carlos Fernández Fasero, denunciou onte que o Bipartito deixou unha débeda de 2,6 millóns de euros nesta institución, ante o que deputada nacionalista Ana Pontón o acusou de "manipular" e de tratar tapar a súa "falta de xestión" neste ámbito.
A discusión produciuse no seo da Comisión 4 de Educación e Cultura, na que o deputado popular Ignacio López Chaves se amosou moi crítico co bipartito e a xestión, en concreto, da "Consellería de Cultura do BNG", o que motivou o malestar nos asentos nacionalistas por facer "oposición da oposición". En resposta ao parlamentario do PPdeG, o director de Agadic explicou que a débeda cando accedeu ó novo goberno ascendía a 2,6, dos cales 826.000 euros se corresponden con débedas pendentes de pagamento. "Non naceu con bo pé", constatou na súa intervención. Así, explicou que dende que ocupa o seu posto de director da axencia, saneáronse as débedas, "aínda que segue habendo problemas de xestión interna", que atribuíu á ausencia de estatutos na institución. Neste sentido, botoulle en cara ó BNG que non desenvolvese esta cuestión en nove meses, ante o que Pontón lle recordou que agora goberna el.
O director do Agadic apuntou que, na actualidade, existen 800.000 euros aínda pendentes por pagar e que as previsións que manexan é deixar esta cifra "a cero" este ano ou, polo menos, "ao mínimo posible".
Pontón criticou que haxa que escoitar na comisión que o PP faga "oposición da oposición e falsee a realidade" e interrogou o alto cargo da Xunta acerca de se reduciu o orzamento de Agadic para 2010. Fasero admitiu que se produciu unha redución "como consecuencia do plan de austeridade" da Xunta, que ascendeu a 1.090.000 euros. Esta minoración produciuse no capítulo II -de gastos bens correntes e servizos- de 274.000 euros; no capítulo IV -transferencias correntes- 35.000 euros; e capítulo VII, de transferencias de capital, que suma 780.000 euros. Ademais, indicou de que en 2008, o Centro Coreográfico Galego recibiu 1.180.000 euros, mentres que este ano o montante se reduciu a 779.000 euros.
Chaves fala dun "pufo millonario"
Segundo o deputado do Partido Popular Ignacio López Chaves o goberno bipartito realizou unha "ineficaz xestión" e que esta se baseou, unha vez pasadas as eleccións do 1 de marzo, na "política de terra queimada", acusando o BNG de "mala xestión deliberada e de deixar un pufo millonario" na Agadic. Pontón protestou ante a presidenta da comisión pola intervención de López Chaves, quen tería que, ao seu xuíxo "dirixir a súa pregunta ao Goberno" .
