Os artistas plásticos galegos falan da súa situación periférica

Os artistas plásticos galegos denunciaron a súa situación "periférica" que os obriga a trasladarse a metrópoles como Nova York ou Berlín para que as súas obras teñan "a proxección desexada", segundo explicaron na feira de arte que tivo lugar a pasada fin de semana na Coruña, Outonarte. Nunha mesa redonda que tivo lugar en Palexco, Xulio López Varcárcel, que fixo de moderador, sinalou que no lanzamento dunha obra, ademais dos aspectos "puramente artísticos", tamén inflúen outros relacionados coa crítica, os intereses das galerías e os medios de comunicación.

Ademais de Valcárcel, no coloquio participaron o crítico Joaquín Lens, as artistas Mar Caldas, Mirian Pérez e Nieves Seara, e o director das salas de exposición municipais da Coruña, Jaime Oíza.

Confirmaron "o bo momento" da arte galega, con artistas "de primeira orde" a nivel mundial, como Leiro, Murado ou Antón Lamazares, pero dixeron que non son "extrapolables" porque a maioría se atopan en situación de mecenado institucional.