Briallos e Pontevedra danlle a man a París na pintura de Celso Varela

Celso Varela, que expón este mes en París, retratado ante os seus lenzos

A nenez do artista, as paisaxes de Briallos e as cores da infancia, fíltranse aínda hoxe na obra de Celso Varela (Portas, Pontevedra, 1952). Ese suxestivo equilibrio entre a figuración e a abstracción -que medra dunha formación autodidacta, atenta ao que de emocional e instintivo hai no acto de pintar-, é o que poderá ver, a partir do vindeiro 16 de febreiro, quen se achegue ao vernissage da Galerie Leonardo de París.

A obra de Varela verase en París despois dunha importante exposición, celebrada na Casa das Artes de Vigo, predio no que os seus cadros conviviron coa importante exposición antolóxica de Maruxa Mallo. Dende a miña fiestra, título xenérico da mostra, recollía lenzos realizados por Celso Varela entre 2002 e 2009, na súa maioría óleos e pasteis. Unha selección desta última etapa creativa é o que ficará na galería parisiense de J. M. Leonardo de Sá, no 62 da rue d'Hautpoul. Paisaxes, retratos, bodegóns e interiores domésticos que -grazas ao catálogo da mostra Dende a miña fiestra, prologado polo crítico Tomás Paredes, Presidente da Asociación Madrileña de Críticos de Arte- chamaron a atención do galerista portugués, residente na capital francesa, e que se puxo en contacto co artista para acordar a produción da mostra de París. A exposición de Varela poderá visitarse até o vindeiro 13 de marzo.