Bugallo destitúe o seu número dous por oporse á privatización da CdC

A conselleira de Cultura, Ánxela Bugallo, e o seu xa ex número dous, Carlos Alberto Amoedo, no Parlamento

Ao último do Consello da Xunta de onte, cando todos os asistentes pensaban que concluíran os puntos do día, o conselleiro da Presidencia, Xosé Luis Méndez Romeu, anun­cioulles que había un asunto pendente: o cesamento de Carlos Alberto Amoedo, secretario xeral de Cultura e o segundo do departamento da nacionalista Ánxela Bugallo. Os conselleiros non puideron reprimir un xesto aloulado, sobre todo os do BNG, que non tiñan nin a máis mínima idea da decisión tomada pola súa compañeira de partido. Até o presidente da Xunta, Emilio Pérez Touriño, na roda de prensa posterior ao consello, falou nun ton inusual "dunha perda de confianza" por parte de Bugallo e obviou os agradecementos a Amoedo polos servizos.

Con esta bomba política concluía de momento a cadea de desencontros entre a conselleira de Cultura e o seu segundo. A súa relación empezou tanteándose os caracteres. Ao igual que o resto do equipo de Bugallo -e de todas as consellerías nacionalistas-, o Bloque foi quen o designou para o cargo e non a conselleira.

Amoedo estaba vinculado a unha das familias do partido -Unidade Galega- e chegaba avalado pola súa traxectoria: publicara, como catedrático de Dereito Administrativo, varios libros contra os denominados chiringuitos da Administración e eses coñecementos servíronlle para desenvolver institucións singulares como a Axencia Galega das Industrias Culturais (Agadic), da que foi o seu facedor xurídico.

O desencontro arrinca dos bosquexos de Bugallo para a Cidade da Cultura. En liña con outras correntes do BNG, Amoedo amosoulle o seu profundo desacordo pola creación dunha fundación que supoñía, na práctica, privatizar a xestión do polémico complexo do Gaiás, construído con cartos públicos. Esas continuas obxecións fartaron a Bugallo e deixouno á marxe de calquera decisión. El incomodouse co castigo e tomou a decisión de non serlle leal á conselleira pero de manterse fiel ao partido: regularmente, envíaballe ao BNG informes do que facía a súa xefa. Bugallo entrou en cólera ao descubrilo. Tratou de despedilo inmediatamente pero o vicepresidente Anxo Quintana esixiu paciencia. A case cinco meses das elecións, ésta agotouse e Bugallo cesouno sen avisar sequera a Quintana.

Xosé Carlos Sierra, un museólogo especializado en patrimonio etnolóxico e antropolóxico será o substituto. Até agora viña desempeñando a función de delegado da Consellería de Cultura en Ourense.