O Clúster do Produto Gráfico viaxa a Düsseldorf para a feira Dupra 2008

O Clúster do Produto Gráfico e o Libro Galego asiste con vinte empresarios do sector á feira Drupa 2008, a Feira Mundial da Industria Gráfica, os Medios Impresos e da Transformación do Papel, que se celebra do 29 de maio ao 11 de xuño en Düsseldorf (Alemaña). Esta misión, do 2 ao 5 de xuño, é froito da sinatura dun convenio de colaboración entre o Clúster e a Cámara de Comercio de Santiago.

A visita realízase co obxectivo de profundar nas últimas novidades tecnolóxicas, así como celebrar reunións con fabricantes, agrupacións e entidades de interese para apertura de novos mercados. O presidente do Clúster do Produto Gráfico e do Libro Galego, Jacobo Bermejo, explicou que "Drupa é unha cita ineludible que se celebra cada 4 anos e, onde se poden ver non só as últimas novidades tecnolóxicas senón as últimas tendencias do sector a nivel mundial, así como ter información de primeira man sobre a competencia". Bermejo engade que "nesta misión temos como reto intentar acadar acordos coas grandes firmas para a cesión de maquinaria encamiñada a dar unha formación de primeiro nivel en Galicia, un proxecto que desenvolve o Clúster con outras institucións galegas".