Aspecto da nova colección ‘Dicionario Xeográfico Ilustrado de Galicia’

A aproximación da xeografía como ciencia global e estudo do país ás persoas é, segundo o Colexio de Xeógrafos de Galicia, unha das principais contribucións do Dicionario Xeográfico Ilustrado de Galicia que sairá á rúa o vindeiro domingo, día 20 de decembro, cos xornais EL CORREO GALLEGO e Galicia Hoxe.

O presidente deste colectivo, Ignacio Fernández López, valorou de xeito moi positivo esta ambiciosa colección, primeiro proxecto editorial deste século que con 28 tomos intenta achegar o coñecemento de todo o territorio galego. Fernández López manifestou, neste sentido, que "o 80% da información que hoxe en día manexamos ten que ver co territorio. Os xeógrafos o que facemos é traballar con esa información, con enormes cantidades de datos, por iso é fundamental ter bases onde agrupar eses datos, polo que estas publicacións que teñen que ver coa recollida da información xeográfica son fundamentais tanto para o noso traballo como a escala xeral".

Unha obra necesaria

Fernández López engadiu que este dicionario, escrito enteiramente en galego, era, sen dúbida, unha obra necesaria, e de feito considerouna como un "auténtico referente a escala estatal neste ámbito" e o máximo responsable dos xeógrafos galegos destacou sobre todo a proxección desta nova obra. Neste sentido, Fernández López apuntou que é determinante o feito de que a súa publicación esté vencellada a un medio de comunicación: "Este tipo de iniciativas canto están unidas a publicacións periódicas achegan ao lector unha información que non afecta exclusivamente aos xeógrafos, que é algo que ten que ter unha repercu- sión pública no conxunto da cidadanía".

Cun formato áxil e de diseño avanzado, a obra estivo dirixida polo prestixioso profesor Francisco Javier Río Barja. Elaborouse durante máis dun ano e medio por un equipo especializado de traballo vinculado ás tres universidades galegas. Conta cun total de 10.000 fotografías e mil mapas e infografías con información presentada de xeito conciso. Entre os contidos temáticos, referentes como o Camiño de Santiago, a pesca, a gandeiría ou o desenvolvemento urbanístico.