A CRTVG quere poñer cláusulas nos contratos de dobraxe en 2009

O director xeral da CRTVG, Benigno Sánchez, en comparecencia no Parlamento en imaxe de arquivo FOTO: Ramón Escuredo

O director xeral da Compañía de Radiotelevisión de Galicia (CRTVG), Benigno Sánchez, asegurou onte que se emprenderán medidas de control para controlar o cumprimento das normativas vixentes e garantir unhas condicións de traballo "dignas" aos actores de dobraxe.

Na comisión de control da CRTVG no Parlamento, en resposta a unha cuestión formulada polo deputado do BNG Bieito Lobeira, o director xeral da compañía explicou que, por un lado, se incluirá unha cláusula específica para vincular a continuidade dos contratos ao cumprimento da legalidade vixente.

En segundo termo, agregou Sánchez, o ente público realizará, a partir do 1 de xaneiro do próximo exercicio, un control "exhaustivo" das cotizacións á Seguridade Social das distintas empresas que contrate Televisión de Galicia para a dobraxe.

Con estas medidas, Benigno Sánchez dixo que a compañía aspira a mellorar, dignificar e regularizar profesionalmente este colectivo de traballadores ante a preocupación suscitada polo parlamentario nacionalista, que fixo fincapé na necesidade de mellorar as condicións laborais, así como a corrección lingüística empregada.

Por outro lado, o director xeral recoñeceu que as partidas económicas destinadas a dobraxe se reduciron, aínda que precisou que esta circunstancia se debeu a que diminuíu a produción allea en favor da propia, ao respecto da que dixo estarse a intensificar o labor de supervisión global dos produtos. Noutro punto da orde do día, o deputado do Partido Popular de Galicia Diego Calvo volveu cuestionar a pluralidade dos informativos da televisión, e denunciou que "por criterios políticos" se minimice a presenza do partido da oposición ata o punto de "non cubrir" algún acto do seu presidente, Alberto Núñez Feijóo. Ademais, o parlamentario popular comparou os espazos de noticias "ao NO-DO -aproveitando "datas que algúns se encargan de rememorar''-, e reprobou que neles só "se informa do que fan o presidente e os conselleiros socialistas".

Benigno Sánchez defendeu a "credibilidade" da cadea, algo que "perdeu" o anterior Goberno coa retransmisión da catástrofe do Prestige, e argumentou que a audiencia dos informativos se incrementou en oito puntos dende a anterior xestión e malia a entrada doutras empresas -Cuatro e La Sexta-.

Sobre a débeda histórica da compañía, dixo que durante a súa xestión quedou reducida en 38,3 millóns de euros, ao pasar de 102,4 millóns a 64,1, en resposta ás acusacións do portavoz popular, quen afirmou que se lle recordaría "facer dimitir a Antón Losada como secretario xeral de Vicepresidencia, dividir o Goberno e manipular".