'Espacio Atlántico' pretende que Vigo sexa unha cita internacional

O escultor Cándido Pazos, nunha das pasadas edicións da feira de arte viguesa FOTO: gallego

Desde o 14 ao 18 de xaneiro, Vigo celebrará a cuarta edición da feira de arte contemporánea Puro Arte baixo un novo nome, Espacio atlántico. Nela, participarán as galerías máis destacadas de España e Portugal, así como outras internacionais, que xa confirmaron a súa presenza.

Trátase da cuarta edición desta feira, a primeira coa súa nova imaxe. Deste xeito, preséntase completamente renovada, cunha vocación máis internacional e coa firme intención de posicionarse como unha cita de referencia ineludible para a arte peninsular.

O punto de encontro será o Recinto Feiral Ifevi da cidade olívica. Alí, galerías de todo o mundo amosarán a obra dos artistas máis acreditados da escena internacional, ademais de promover valores emerxentes e fomentar o coleccionismo e o goce da arte contemporánea.

Este cambio nas directrices atende a unha esixencia maior na presenza de galerías de prestixio internacional, co fin de facer deste mercado unha das citas estables no calendario internacional da arte. Está dirixido por Marta Scarpellini e conta coa Presidencia de Honra dos Príncipes de Asturias.

Ademais, Espacio atlántico conta a partir deste ano co asesoramento e dirección artística de David Barro e a súa empresa Dardo, encargada de potenciar a imaxe da feira, de cara a convertela nunha das principais referencias dos encontros de España e Portugal.

Nestes momentos, xa foi confirmada a presenza de moitas das principais galerías da Península Ibérica, como as portuguesas Filomena Soares, Mário Sequeira, Carlos Carvalho, Fernando Santos, Graña Brandeo, Pedro Cera, 3+1 Arte Contemporánea, Quadrado Azul, MCO ou Pedro Oliveira; e as españolas Fúcares, Heinrich Ehrhardt, Max Estrella, Fernando Pradilla, Xavier Fiol ou Raquel Ponce, entre outras.

En Galicia, chegouse a un acordo de colaboración coa Asociación Galega de Galerías de Arte e tamén se confirmou a presenza de galerías como Adhoc, Trinta, SCQ, Bacelos ou C5 Colección/Factoría Compostela, entre outras.

No que respecta aos projects, onde se presenta a obra dun único artista, confirmouse a presencia de galerías como Soledad Lorenzo, Luis Adelantado e ADN.