A exposición 'Galicia 25' recala no Museo do Pobo

O Museo do Pobo Galego, en Santiago de Compostela, acollerá dende hoxe e ata o 17 de abril a exposición itinerante Galicia 25. Unha cultura para un novo século, ideada polo Consello da Cultura Galega (CCG) e apoiada por Caixanova, ademais de contar co apoio da Xunta de Galicia. Logo do seu paso por Vigo, Pontevedra e Ferrol, a mostra será inaugurada hoxe na capital galega, nun acto ás 20.00 horas, no que participarán o alcalde de Santiago, Xosé Sánchez Bugallo, o presidente do Consello da Cultura Galega, Ramón Villares, o presidente do padroado do Museo do Pobo Galego, Isaac Díaz Pardo, e outras personalidades.

A mostra, que se presenta como "un escaparate da cultura galega", está comisariada por Víctor F. Freixanes, Iago Seara e Henrique Monteagudo. A exposición estrutúrase arredor das denominacións "formas e espazos", "palabras, imaxes e sons" e "fíos e desafíos". Galicia 25. Unha cultura para un novo século aborda temáticas como arquitectura e identidade, cultura ambiental, espazos da comunicación, deseño e industria, historias debuxadas, o valor do patrimonio, a creación, a sociedade do coñecemento, os sons do lugar, o territorio luminoso das palabras, a festa dos máis novos, o libro, imaxes e ficcións, artes escénicas e as diferentes posibilidades e presenzas de Galicia no mundo.

A mostra Galicia 25 formou parte do programa de actos organizados polo Consello da Cultura Galega para conmemorar os seus primeiros vinte e cinco anos. Con anterioridade, a exposición, que viaxará por todas as cidades galegas, puido verse en Vigo, Pontevedra e Ferrol. En Compostela permanecerá ata o vindeiro 17 de abril.