Ferrín solicita o apoio da Xunta e do Estado ás contas da RAG

Ferrín, no centro, entre José Luis Baltar, esquerda, e Manuel González, na recepción na Deputación FOTO: Efe

O novo presidente da Real Academia Galega (RAG), o ourensán Xosé Luis Méndez Ferrín, reivindicou onte o apoio financeiro ás contas da Academia a través da súa inclusión nos orzamentos da Xunta de Galicia e tamén nos Orzamentos Xerais do Estado, xa que "ten dereito a iso e así debera ser".

Tras unha recepción oficial que tivo lugar onte á mañá na Deputación de Ourense, Ferrín equiparou o caso da RAG co da Academia Vasca, que se atopa "economicamente avalada polo Goberno de Euskadi, a Deputación Foral de Navarra, as catro deputacións e o Ministerio de Cultura da República Francesa".

A preguntas dos xornalistas sobre a situación económica da Real Academia e tras o ofrecemento por parte de José Luis Baltar de asinar algún tipo de convenio de tipo económico nun futuro para "avalar o seu labor", Méndez Ferrín afirmou que o "ideal" sería lograr "unha dotación económica máxima", xa que os seus responsables calculan que precisarían de ao redor de " 1,2 millóns de euros anuais". Nesta liña, sinalou que na actualidade teñen que realizar "tarefas permanentes", como a nova edición do seu dicionario, "que é unha tarefa inacabable"; así como "as terminoloxías, continuar coa toponimia e na onomástica persoal". Ferrín recordou que a RAG non dispón de fondos propios e polo tanto está obrigada a "pedir subvencións finalistas",. Así, manifestou que lles vén "moi ben" o "respaldo económico histórico das Deputacións", anque o considerou "insuficiente". Ferrín recordou que na actualidade a Academia galega conta cun total de "28 persoas en nómina" e indicou que ante "os previsibles recortes de subvencións" a institución está "moi apurada", polo que estiman que serían necesarios 1,2 millóns de euros "para sobrevivir".