Fica aberto o prazo para o envío de orixinais ao premio Diario Cultural

O Premio Diario Cultural de Teatro Radiofónico, que promoven a Radio Galega e o Centro Dramático Galego (CDG), publicou a convocatoria da súa cuarta edición, para a que xa está aberto o prazo de presentación de orixinais.

O Premio, único das súas características en Galicia e pioneiro no Estado, mantén así unha traxectoria de catro anos consecutivos e consolídase no seu afán de divulgar a escrita teatral galega, promover o encontro entre a audiencia e o teatro e contribuír á recuperación do formato de teatro na radio desde unha perspectiva contemporánea.

A actual cuarta edición do Premio, que leva o mesmo título que o programa da Radio Galega decano da información cultural en Galicia, desenvolverase ao longo de toda a temporada. O prazo de recepción de orixinais remata o próximo 31 de decembro e, a continuación, constituirase un xurado para a súa avaliación. O ditame está previsto para o 27 de marzo, Día Mundial do Teatro.

O xurado, integrado por profesionais do mundo da escena e da radio, seleccionará -de entre o total de presentadas- as obras finalistas, que serán dramatizadas para a súa emisión por un equipo de actores e actrices coordinados polo CDG. As dramatizacións emitiranse ao longo do mes de marzo nos distintos programas da radio pública galega. Das emitidas, o xurado escollerá a obra premiada finalmente; e a audiencia votará o texto que recibirá o premio do público.

Cada unha das dúas categorías do Premio está dotada economicamente con 3.000 euros e as catro obras finalistas serán publicadas nun libro-cd.