Galicia Calidade impulsa o novo anuario de 'Creatividade galega'

O xerente de Galicia Calidade, Ignacio Louzao, presentou onte en Compostela a terceira edición do anuario Creatividade Galega. Esta publicación recolle máis dun milleiro de traballos desenvolvidos ao longo do ano pasado por máis de 80 das mellores axencias de publicidade galegas así como das escolas de deseño e facultades do gremio.

No acto, ao que asistiron representantes das empresas participantes no anuario, estiveron presentes tamén os seus autores, os investigadores e profesores da Universidade de Vigo Eva Quintas, Chechu Pérez e Alberto Dafonte.

Segundo indicou Xabier Ignacio Louzao, esta publicación nace coa idea de darlles visibilidade aos creadores galegos, nun momento no que o seu traballo está sendo recoñecido tanto en Galicia como no resto de España. Louzao destacou a importancia que ten para as empresas galegas posicionar os seus produtos nos mercados exteriores e ir así confeccionando un tecido no que a industria, baseada no desenvolvemento e na innovación, sexa un piar fundamental na economía do noso país.

Ademais, sinalou, que nunha época de globalización e internacionalización é preciso reforzar e reafirmar os nosos valores como país, a imaxe de marca de Galicia. Pola súa banda, Chechu Pérez, un dos autores do libro, destacou o aumento que cada ano vai tendo esta publicación, tanto no número de traballos enviados como tamén na presenza definitiva no catálogo.