Feijóo, dereita, cun ramo de flores xunto a Carlos Negreira e María Seoane, onte na Coruña FOTO: Almara

O 17 de maio pretende ser un día de celebración e reivindicación do galego, pero hoxe o idioma sitúase como un elemento de confrontación. A vitoria popular o 1-M e a súa intención de derrogar o decreto que establece que a metade das materias se impartan na lingua de Rosalía xerou a resposta airada de diversos sectores sociais, non aplacadas nin tras o nomeamento do lingüista vigués Anxo Lorenzo como novo secretario xeral de Normalización Lingüística.

As rúas de Compostela acollen hoxe una manifestación convocada pola Mesa pola Normalización contra a política da Xunta. O presidente do Goberno, Alberto Núñez Feijóo, advertiu onte que primará a liberdade sobre calquera otra cuestión. "Quero reafirmar o compromiso coa Galicia que quere ser galega á súa maneira e falar as súas linguas coon liberdade. Non é tempo de imposicións, senón de diálogo", dixo onte tras realizar unha ofrenda floral na Coruña ante o monumento ó escritor Curros Enríquez.

A apelación á liberdade chocou coa advertencia ós críticos. Ó PP, proclamou, tócalle "protexela -a lingua- dos que queren apropiarse dela". De novo, reiterou unha mensaxe que na campaña foi máis dura. O galego non é "patrimonio de ningunha sigla ou plataforma", algo que defendeu tamén Ramón Piñeiro, figura á que se lle dedica o día de hoxe.

Tras as críticas recibidas por parte dos sectores nacionalistas, o presidente da Xunta sacou peito da tradición do seu partido e lembrou que foron os presidentes do PP "quen estamparon a súa sinatura en disposicións que forman o corpo básico da regulación do galego" e os que conseguiron "que o galego se vise por todos como un idioma tan amable como os seus falantes".

Arroupado pola cúpula do seu partido, Feijóo reivindicou o legado do PP na defensa do idioma. "Sentímonos continuadores deste país, do galeguismo que soñaron cunha Galicia unida e orgullosa de si mesma", proclamou vinculandoa súa formación con escritores como Curros, Wenceslao Fernández Florez, Emilia Pardo Bazán ou Concepción Arenal.

Tamén quixo gabar a figura de Ramón Piñeiro e establecer un vínculo entre el e a postura do seu partido perante o idioma. "Algúns acusárono de ser un mal galego e mesmo de traizoar a non se sabe moi ben que causas. Pero Galicia estaba con el. Galicia estaba connosco".

. ddominguez@elcorreogallego.es