A Mesa advírtelle ao PPdeG do risco de "confrontación social" en política lingüística

A Mesa pola Normalización Lingüística clausurou onte a súa Asemblea xeral con advertencias ao PPdeG do "perigo de confrontación social" que supoñen os seus anuncios en materia de política lingüística, e chamou "a todos os galegos" a manifestarse "polo dereito ao galego" o próximo maio, coincidindo coa celebración do Día das Letras Galegas.

Segundo explicou a Europa Press o presidente da asociación, Carlos Callón, as declaracións "de quen vai ostentar a Presidencia da Xunta" -en referencia ao líder dos populares galegos, Alberto Núñez Feijóo- non son máis que "mentira" e "demagoxia", polo que "ofenden a grande parte da poboación galega".

"Di que vai gobernar para todos, pero logo anuncia unha lexislación que pretende discriminar aos galegoparlantes", asegurou. Na súa opinión, Feijóo pretende gobernar "sen escoitar o país" e derrogar leis "que se aprobaron por consenso".

Ademais, na xornada de onte, os membros da asociación reelixiron a todos os cargos da Permanente, órgano de dirección da Mesa, de forma que Callón seguirá sendo o máximo dirixente os próximos tres anos.

Pola súa parte, Fran Rei e Iria Taibo seguirán ocupando os postos de vicepresidente e secretaria, respectivamente. Estes son os tres principais órganos unipersonais da agrupación.

Presidente de honra

Así mesmo, a asemblea decidiu "por unanimidade" o nomeamento do histórico do galeguismo Avelino Pousa Antelo como presidente de honra da agrupación. "Aos seus 94, case 95 anos, sempre está nos actos", resaltou Callón, e incidiu no "vínculo entre xeracións" que supón a súa presenza na Mesa.

Respecto a "outro dos puntos principais da asemblea", os membros da Mesa formularon "a introdución de melloras en canto ao debate interno", indicou, co que buscan unha "maior corresponsabilidade dos grupos de base".

Nesta dirección, destacou que a asociación reorientará a súa actividade cara aos "actos de rúa", fronte ao "novo panorama político" que vive Galicia.

Desta forma, de aquí ao día 17 -cando está convocada a manifestación- a asociación repartirá materiais polas rúas galegas con "datos reais" para "mostrar a realidade" da existencia dunha lingua "estranxeira no seu propio país". "Reivindicamos o dereito básico a falar en galego con normalidade", aseverou Callón, algo que "non se pode facer a día de hoxe en diferentes ámbitos da Comunidade" e que "non prexudica a ninguén", concluíu.

Para rematar, Callón fixo fincapé no aumento no número de socios da Mesa nos últimos tres anos, pasando dos 2.900 os 3.500 membros. "Somos a asociación cultural máis grande de Galicia", remarcou, tras o que se mostrou confiado en chegar aos 4.000 compoñentes "durante esta lexislatura".