A música galega vai desembarcar na feira Womex de Copenhaguen

Expositor da delegación galega ‘Galician Tunes’, nunha pasada edición de Womex. celebrada en Sevilla

A música galega estará presente entre os próximos 28 de outubro e 1 de novembro no Womex, a feira máis importante de world music do circuíto internacional, que desenvolverá neses días na capital de Dinamarca, Copenhaguen, a súa edición de 2009.

Dez empresas discográficas, dúas asociacións profesionais e Agadic despregarán na capital dinamarquesa o potencial dos artistas galegos actuais, identificados baixo a marca Galician Tunes, cunha estratexia dirixida fundamentalmente aos mercados europeos e latinoamericanos.

Ao encontro, no que este ano participan 3.000 axentes acreditados procedentes de 90 países, viaxan as compañías Falcatruada, Ouvirmos, Zouma Records, Berrogüetto Producións, Abada, Mare, Articket, Sul Produccións, Nordesía e Lóspregos. As dúas últimas disporán ademais de cadanseu espazo exclusivo. Xunto á representación institucional que encabezará o director da Agadic, Juan Carlos Fernández Fasero, tamén estarán en Womex integrantes das dúas principais asociacións do sector: AGEM (Asociación Galega de Empresas Musicais) e Agaphono (Asociación Galega de Produtoras Fonográficas), en quen recaeu a organización da participación galega no evento.

Desde o expositor de Galician Tunes darase cobertura loxística a todas as empresas galegas desprazadas e prestaránselle servizos de tradución e de intermediación comercial. Ademais do material promocional xenérico e do particular que acheguen as diferentes casas discográficas, a delegación galega distribuirá un CD de audio cunha selección de temas interpretados por diversos artistas galegos.

Neste CD, inclúense pezas de bOnOvO, Fía na Roca, Milladoiro, Berrogüetto, Nova Galega de Danza, Rosa Cedrón, Mercedes Peón, Uxía, Fran Pérez Narf Manecas Costa, Hermanos Moreira, Orquestra Vigo 430, ISGA Collective, Donatore di Groove, Xosé Manuel Budiño, Cristina Pato Mutenrohi ou Anxo Lorenzo. Tamén se inclúe unha promo de varios músicos baixo o título Rumbas, procedente da plataforma Descarga ao Vivo.

Repartirase así mesmo a guía Galician Festivals, que recolle a listaxe de festivais e ciclos de música galegos máis destacados e foi elaborada especificamente para a promoción internacional.