Jueves 26.02.2009
Hemeroteca web
|
RSS
 |
| O diario ten agora como enderezo www.galiciahoxe.com, coincidindo co lanzamento do novo deseño |
Galicia Hoxe, o único diario en galego que se publica tódalas xornadas en soporte papel e na rede, estreou un novo deseño da súa web, máis moderno e que permite amosar máis noticias e imaxes na portada, ver vídeos de Correo TV e escoitar audios de Radio Obradoiro e compartir contidos máis doadamente con outras webs do Grupo Correo Gallego, en especial a de www.elcorreogallego.es.
Os cambios comezan co propio dominio co que se accede a web, que agora é www.galiciahoxe.com e que substitúe como dominio principal o anterior, www.galicia-hoxe.com.
Opinión, sección destacada
A nova estrutura do portal permite agora organizar de xeito máis accesible as informacións que se amosan na portada, e neste sentido fíxose un esforzo especial coa sección de opinión, de xeito que agora todos os artigos do día aparecen agrupados amosando as fotos dos colaboradores e colaboradoras, así como o seu nome e o título do artigo que publican.
Outro punto importante é que se facilita a interacción dos lectores e lectoras a través de enquisas e a posibilidade de valorar os contidos e por suposto consultar cales son os máis valorados a diario.
Ó mesmo tempo, tamén se amosa a listaxe das noticias máis vistas de cada día, o que fai posible a consulta rápida das que as persoas que visitaron a web consideraron máis interesantes, o que pode ser de utilidade para non perder contidos.
A información meteorolóxica de Galicia, que xa se ofrecía, gaña agora un maior protagonismo e entre as novas opcións que complementan os contidos que se publican de xeito habitual no portal está a de ver emisións en directo a través da rede coma no recente Debate sobre o Estado da Autonomía, igual que se pode facer desde www.elcorreogallego.es. En definitiva, máis vantaxes e máis completa presenza en internet.
Integración e maior número de imaxes
O acceso á hemeroteca da web é tamén máis doado e áxil, facendo rápida a busca de informacións pasadas. E en canto ás noticias de última hora, o novo deseño fai posible a súa publicación rápida na portada así como a integración dentro das distintas seccións do xornal, de xeito que estas se poden ir actualizando ó mesmo tempo que a páxina principal.
Un aspecto que mellora e que é fundamental hoxe en día é o referente á información gráfica, coa inclusión dun maior número de imaxes de actualidade, o que sen dúbida fai máis atractiva a consulta da web. Igualmente accédese de xeito rápido ás galerías de imaxes publicadas en www.elcorreogallego.es, que teñen sempre unha boa acollida por parte das persoas que visitan a web.
E para facilitar a lectura das noticias, cada unha delas leva botóns para reducir ou agrandar o tipo de letra dos textos e para facer fácil a súa impresión no caso de que se prefira ler ou conservar en papel .
Compartir noticias máis axilmente
·· Nun momento no que as redes sociais e os servizos que permiten compartir noticias gañan protagonismo na rede, quen vexa interesante unha información terá agora botóns para compartila rapidamente con outros usuarios e usuarias. Así, pódese escoller compartila a través de Facebook, Twitter ou Chuza, entre outros.
Gardar as ligazóns ou mesmo envialas
·· Outra das opcións presentes agora é a de gardar as ligazóns de interese en servizos como Del.icio.us, por exemplo, que permite consultar as webs que non queremos perder, independentemente de que esteamos ou non no noso computador. E por suposto, coma sempre, é posible convidar a xente por e-mail a ver unha noticia.
