Premio para un blog do COAG sobre a aplicación correcta do Código Técnico

O Colexio Oficial de Arquitectos de Galicia (COAG) será recoñecido cunha mención especial do concurso Innovación nos Servizos Colexiais, convocado polo Consejo Superior dos Colexios de Arquitectos de España, no marco das actividades programadas para o Congreso de Arquitectos de España, que se celebrará en Valencia do 1 ao 3 de xullo.

Coa aprobación do CTE en 2006, o COAG adoptou a determinación de dar a maior cobertura informativa posible, coa consecuente formulación de dúbidas e interpretacións que xurdirían no colectivo galego, así como facilitar a adaptación ao novo marco normativo do traballo dos arquitectos.

O blog temático sobre o CTE (http://blogcte.coag.es) é un espazo en Internet que inclúe as esixencias mínimas de seguridade, habitabilidade e funcionalidade que recollen a Lei de Ordenación da Edificación (LOE) e as Normas do Hábitat galego. O blog foi posto en marcha no mes de marzo de 2007 polo Grupo de Asesores-CTE e observa unha media de catrocentas mil visitas mensuais.