Rosa Aneiros, mellor autora do ano

A escritora Rosa Aneiros, durante a súa intervenión na gala de entrega dos premios Gallegos del Año

Os Premios da Edición deixaron este ano un paradoxo: converteron a Rosa Aneiros, distinguida na pasada edición dos Gallegos del Año do Grupo Correo Gallego como Galega do mes de xuño, na mellor escritora do ano aínda que ningunha das súas novelas finalistas no apartado de mellor obra de ficción -Ás de bolboretas e Sol de Inverno- lograron o recoñecemento do xurado. O triunfo neste apartado, contra todo prognóstico, foi dar nunha novela que pasou máis que dicretamente para a crítica e os lectores, Sidecar, de Alberto Lema, autor de culto ao que o galardón apontoa como unha das voces máis persoais do panorama narrativo galego.

A V Noite da Edición de Galicia, durante a que se entregaron os premios, celebrouse onte no Liceo de Ourense, e contou coa asistencia dos conselleiros de Cultura e Educación, Roberto Varela e Xesús Vázquez Abad.

Con esta gala -patrocinada polo Centro Español de Dereitos Reprográficos (CEDRO)-, a Asociación Galega de Editores reúne anualmente a todos aqueles que traballan no campo do libro, a súa produción e a súa edición.

O Premio Ánxel Casal ao Libro de ficción do ano foi para Sidecar, de Alberto Lema, publicada por Galaxia ao mesmo tempo que a súa tradución en castelán, editada por Caballo de Troya. Considerada polo seu propio autor como unha obra de iniciación, Sidecar amosa nun estilo algo casual e próximo al pulsións sexuais de dous amigos nunha Compostela de contratos lixo, mulleres con carácter e estudantes acirrados.

As Cartas de republicanos galegos, de Xesús Alonso Montero, levou o premio Ánxel Casal ao Libro de non ficción. Alonso Montero, que tamén era finalista no apartado de mellor escritor do ano, reúne neste volume cento vinte cartas que diferentes republicanos galegos condenados a morte escribiron, pouco antes de falecer, entre o 1936 e o 1948.

O Premio Ánxel Casal ao Libro de poesía ou de teatro do ano 2009 recaeu nunha peza dramática, o Ciclo de Xúpiter, de Millán Picouto, editada por Linteo.

O Premio Xosé Neira Vilas ao Libro infantil e xuvenil recoñeceu A araña e máis eu, editado por Kalandraka.

O Premio Lois Tobío ao Libro traducido do 2009 recaeu en Contos completos de Allan Poe, vertido ao galego para a editorial Galaxia por Eva Almazán, finalista con tres obras.

Gabriel Pacheco fíxose co Isaac Díaz Pardo ao Libro ilustrado do ano, editado por OQO e as Fotobiografías de Ouvirmos lograron o Rosalía de Castro á iniciativa editorial do 2009.