O Salón Teatro programa desde hoxe os 'Animales artificiales' de Matarile

Matarile Teatro regresa a Galicia para presentar os seus Animales artificiales, unha montaxe dirixida por Ana Vallés e na que nove artistas procedentes do teatro, da danza e da música amosan o ser humano como animal en observación.

A compañía galega ofrecerá catro funcións no Salón Teatro de Santiago a partir de hoxe ata o sábado ás 20.30 horas e o domingo ás 18 horas, logo de estrear a obra no Festival de Teatro de Málaga o mes de febreiro pasado e percorrer escenarios de Madrid, Murcia, Castela-León, Castela-A Mancha, Madrid e Portugal. Animales artificiales pasearase este ano pola Feira de Artes Escénicas que se desenvolverá na capital galega no mes de outubro, así como polo Teatro Jovellanos de Gijón e polo Festival Don Quijote de París.

Animales artificiales parte do feito de que o comportamento humano vén dado pola súa condición de seres observados, e de aí procede a súa artificiosidade. Así, a obra cuestiona a bondade da natureza e as pautas de convivencia que, cando se rompen, "fan saír o animal máis voraz, prodúcese a loita do home contra o home", indicou Vallés.

Para transmitir estas ideas, os de Matarile consideran o teatro o mellor medio, xa que a arte é "a máxima representación do artificio, das múltiples interpretacións que o ser humano ten da realidade". "O teatro é a máxima expresión da vida, un espazo para mirar e fomentar a mirada propia", explica Vallés.

A peza é produto da compilación de ideas e estímulos por parte de Ana Vallés a través de cartas cos actores. Así se incorporou por exemplo o personaxe do contratenor Klaus Nomi, a proposta do bailarín canario Mauricio González, o contratenor Ramón Vázquez, a danza de Mauricio González emprega o ballet para explicar como ata as expresións máis artificiais aparentemente non deixan de ser naturais.

Ao elenco súmanse a alemá establecida en Santiago Helen Bertels, o músico de tuba galego Hugo Portas, o narrador arxentino José Campanari, a asturiana Mónica García, o galego Iván Marcos o madrileño Ricardo Santana e a propia Vallés, a quen Nuria Sanz axuda na dirección e Baltasar Patiño na iluminación e escenografía.