Domingo 07.02.2010
Hemeroteca web
|
RSS
 |
| Feijóo fala con María Bouzas ante Roberto Varela, esquerda, Alfonso Cabaleiro e Xavier Villaverde FOTO: Ramón Escuredo |
O presidente da Xunta, Alberto Núñez Feijóo, destacou onte a aposta do Goberno galego por un sector audiovisual galego "máis forte e competitivo", que contribúa ao desenvolvemento cultural e económico da comunidade, que afronte os novos desafíos e encare o futuro "con ilusión e imaxinación", durante a gala de entrega dos premios Chano Piñeiro celebrada no Salón Teatro de Compostela.
Uns galardóns que nesta cuarta edición recaeron na actriz María Bouzas, no director e realizador Xavier Villaverde, e que tamén recoñeceron a traxectoria de dous persoeiros xa ausentes: José Luis Cabo Villaverde e o cineasta Carlos Velo Cobelas.
Feijóo destacou que os Chano Piñeiro constitúen un recoñecemento institucional aos profesionais que fan posible que o audiovisual galego "xa teña un oco propio no mercado español", e definiu a Carlos Velo Cobelas como "gran mestre do documental, intelectual e galeguista"; mentres que se refiriu a Cabo Villaverde como "un valorado experto en fotografía e un eficaz xestor" durante os anos que estivo á fronte do CGAI.
Da actriz María Bouzas, destacou a súa "variada e nutrida filmografía", e suliñou que "por primeira vez os Chano Piñeiro recoñecen unha muller", e de Xavier Villaverde falou como dun realizador que é "memoria activa e vital do audiovisual galego desde os seus comezos nos anos setenta ata a actualidade"
Haberá un só organismo de coordinación
O titular da Xunta recordou onte que o sector audiovisual hai tempo que vén reclamando un organismo único que coordine as políticas institucionais que lles afectan, e dixo que "niso estamos".
Neste sentido, avanzou que haberá "un organismo único para posibilitar liñas de actuación e políticas concretas e que así se dará a coñecer no prazo máis breve posible", en canto se solucione a complexidade administrativa que todo proceso deste tipo leva acompañado.
Incidiu na necesidade de reestructurar e potenciar o Consorcio Audiovisual de Galicia, pero dixo que "queremos facelo ben, sen présas, para atinar co mellor nun sector que está a dar moitos e bos froitos para a estima e a satisfacción dos galegos".
Resaltou Feijóo o papel de TVG como primeiro "motor do audiovisual galego", co compromiso engadido de "exercer como a gran dinamizadora dos produtos galegos diante da audiencia do país e máis para a audiencia exterior a través da TDT" .
