Unha nova Pecha Kucha Night

Detalle dun autorretrato de Andrea Dasilva, que estará no PKN

O vindeiro venres 11 de decembro terá lugar en Pontevedra u­nha nova edición de Pecha Kucha Night, un singular encontro que encara a súa segunda edición da man da Asociación Galega de Deseñadores, DAG. Na procura da dinamización de espazos para o encontro e o diálogo entre creativos de diversos eidos, Pecha Kucha Night II reunirá na Sala Karma da cidade do Lérez o traballo de varios creadores. Non existen demasiadas fronteiras nesta proposta informal e alternativa -que xa está presente en máis de 190 cidades de todo o mundo-, agás a do tempo. Cada participante dispón de 20 segundos e 20 imaxes (20x20) para expor en público o seu proxecto, "facendo un total de 6 minutos e 40 segundos -cun obrigado break para repoñer a cervexa-", sinalan os organizadores, que buscan, desta maneira, "presentacións concisas e dinámicas, mantendo o interese en todo momento e permitindo a participación de moita xente".

Pero, que xente se vai reunir o vindeiro venres ao abeiro da noite pontevedresa? A listaxe xa se pode consultar na páxina web deste evento www.pecha-kucha.org/night/pontevedra. Trátase de Andrea Dasilva (fotografía e deseño); Anxo Fariña (ilustración); Arturo Álvarez (deseño emocional); Baldo Ramos (arte e poesía); Que palleiro (deseño e audiovisual); Eva Morell (fotografía); Lucía García (arte); Marcos Dopico (tipografía); Pepe Solla e Pepe Vieira (cociña de vangarda); Rita Pajarita (moda); Projecto ['Trepia] (música) e N550 (i+d+i).

A presentación desta noite creativa, que comeza a partir das 22 horas na Sala Karma (rúa Marqués de Riestra 32), virá da man de Antela Cid e Ramón Domínguez. A entrada será de balde e ao finalizar as presentacións, a organización anuncia unha "espectacular sesión" de Zarpael Amor Dilleis.

A primeira edición desta cita internacional tivo lugar o verán pasado, tamén en Pontevedra. A vontade da Asociación Galega de Deseñadores é exportar a outros núcleos como Santiago, Vigo, Lugo ou Ferrol unha iniciativa que avoga pola proxección do capital de creación dos profesionais galegos e pola visibilización dese traballo.

A Coruña é a outra das cidades galegas que xa presentou, o pasado 6 de novembro, a súa propia PKN, no Pub 14! Nesa ocasión expuxeron os seus traballos os arquitectos Juan Creus, Toni García e Carlos Pita; o estudo de deseño gráfico desescribir (www.desescribir.com); o fotógrafo Melki Chichery; o ilustrador e debuxante de cómic David Rubín; a deseñadora de moda Silvia Esquío; e o estudo de intervención gráfica Alavista (estudioalavista.com).