Os veciños de 'Libro de familia' intentarán hoxe cambiar a Elías

A presenza e actitude de Maribel en Santalla violenta a todo o mundo e Marcos toma unha determinación para poñer a Laura contra as cordas, pero a intrigante muller garda un ás na manga que pode comprometer a Laura, nunha nova entrega de Libro de familia, esta noite na Galega.

Amais, os fregueses queren que Elías cambie de hábitos e sexa máis limpo, sobre todo co seu taxi, así que organizan un espectáculo para intentar convencelo de que cambie nese tema.

En Galicia, cruce de miradas, a actriz Marta Larralde, unha das promesas firmes do cine español, será o personaxe que faga esta semana de cicerone, en concreto pola cidade de Vigo, e quen guiará o presentador, Antón Reixa, polos camiños dos seus recordos e anécdotas máis queridas. Doutra parte, entrando na sección do programa Guía secreta, o fotógrafo Xurxo Lobato pregúntase sobre cal é o segredo da tortilla, ao que intentará responder percorrendo toda unha ruta gastronómica en restaurantes como O'Bo, El Manjar, Casa Alfredo ou Casa Tomé.

Nos aspectos antropolóxicos do espazo aos que remite a sección O labirinto dos trasnos, Felipe Senén chega esta semana a Meira, onde visitará a súa colexiata e os dous nacementos do Miño, o Pedregal de Irimia e Fonmiñá, para rematar na carballeira de Outeiro de Rei, onde se xuntan o río Miño e o Ladra.

Onda curta, o programa de Televisión de Galicia que cada domingo pretende dar a coñecer as novas promesas do audiovisual galego, emite este domingo a curtametraxe Trazos, dirixida polo coruñés Simón Casal, de quen xa se puidera ver no programa a súa anterior curta Panta Rei. Trazos é unha historia que nos conta dun xeito orixinal diversos retallos da relación entre os personaxes interpretados polo actor de Guitiriz, Xosé Barato, e a ourensá Ruth Sabucedo. U­nha historia de amor rodada entre Sada e a cidade do Porto que fala das casualidades e do destino. O programa estivo tamén presente na V edición do Festival de Curtas Curtocircuíto, que se desenvolveu durante a semana pasada en Santiago e que se consolida ano tras ano como un dos festivais importantes do Estado. Os espectadores terán ocasión de ver fragmentos das curtas gañadoras e de coñecer a algúns dos directores premiados.

Por último, a música terá o seu lugar grazas á emisión do vídeo musical Cantos de serea, de Magín Blanco e Burgas Beat.