A Vicepresidencia da Xunta de Galicia mostra a súa máis enérxica repulsa polo caso de violencia de xénero ocorrido en Portas, no que resultou morta unha muller esganada polo seu home. A Vicepresidencia da Xunta sigue puntualmente o suceso e xa se puxo a disposición da Delegación do Goberno para ofrecerlle o apoio psicolóxico e de tipo social que poida precisar a familia da vítima.

A violencia contra as mulleres constitúe unha lacra moi complexa que deriva nunha das máis graves e intolerables violacións dos dereitos humanos; por iso, dende a Vicepresidencia remárcase o compromiso na loita contra esta violencia e a busca de medios e alternativas que permitan ás mulleres galegas o exercicio dos seus dereitos como cidadás nun estado democrático.

Dende a Secretaría Xeral da Igualdade pretende trasladarse a mensaxe clara e rotunda do mantemento dunha belixerancia activa contra a violencia de xénero para o que se están a desenvolver día a día medidas dirixidas a apoiar ás mulleres que en Galiza se atopan nesta situación.

Concentracións
Para mostrar a súa repulsa por este suceso, a Vicepresidencia convocou para o luns –ás 12,00 h– concentracións públicas de repulsa e en solidariedade coa vítima, tanto na sede central en San Caetano –na entrada da Vicepresidencia– como nas catro delegacións provinciais. O departamento autonómico tamén se suma a todas aquelas mostras de repulsa que convoquen as organizacións cidadás.

A estes actos están convocados os traballadores e traballadoras da Xunta e todos os cidadáns que se queiran sumar á iniciativa. Con estas concentracións, a Vicepresidencia –a través da Secretaría Xeral da Igualdade– quere amosar a súa condena pola nova morte violenta dunha muller, así como a súa repulsa ante calquera acto de violencia machista.