A UDC edita 'Soñando con palabras' como homenaxe póstumo ao profesor Fernández Roca

A Universidade da Coruña acaba de publicar póstumamente unha colección de ensaios do tristemente falecido profesor da súa institución Xosé Anxo Fernández Roca. Da boa man da tamén profesora da UDC, Maria José Martínez López, en calidade de coordinadora do traballo e de Ana María Porteiro Chouciño como editora, esta selección de traballos permítennos achegarnos dunha maneira directa e intelixente a un bo número de importantes representantes da literatura galega e castelá contemporánea. Desde a poesía de Luís Felipe Vivancos, até o teatro de Lauro Olmo, Carballo Calero, Ramón Otero Pedrayo ou Gonzalo Torrente Ballester, pasando pola narrativa de Francisco Umbral, Valle-Inclán ou os mencionados Otero Pedrayo e Torrente Ballester, o profesor Fernández Roca achéganos aos distintos xéneros literarios cunha agudeza analítica e cunha capacidade de argumentación propia só daqueles eruditos que gozan coa literatura e saben transmitir a súa maxia. Todo é pouco para homenaxear no recordo a un home extremadamente admirado pola súa infinita humildade e maior sabedoría. / José Manuel Estévez-Saá

Xosé Anxo Fernández Roca, 'Soñando con palabras. Escritos do profesor Xosé Anxo Fernández Roca', Mª José Martínez López (coord.) e Ana Mª Porteiro Chouciño (ed.), Universidade da Coruña, 2009, 280 páxs. 18 €