María Solar escribe unha historia fermosa na que hai varias lecturas implícitas e unha mensaxe

De cando en vez María Solar, ben coñecida pola súa ampla traxectoria como profesional dos medios de comunicación, fundamentalmente radio e televisión, volve á literatura, un territorio do que non quere desprenderse. Aínda que alberga a secreta intención (ou non tan secreta) de escribir unha novela para adultos, María Solar móvese como peixe na auga, ou como paxaro no aire, no territorio dos máis pequenos. E agora entrégalles unha historia que ten moitas lecturas. Unha historia na que se fala tamén do que é diferente, e da amizade por encima de todo. Os Nubelos son os personaxes protagonistas, xunto cos Grislás, os que posúen o segredo das lendas. María Solar, que fala dos Nubelos con moita proximidade, explica neste libro como Nubelo de La chegou a coñecer a verdadeira historia do seu pai. Polo medio, como é natural, acción, aventuras, personaxes que semellan sinxelos, pero que están cheos de matices. E de agarimo. E desa linguaxe próxima, limpa, chea de auga fresca e de sons alegres, que María Solar talvez aprendeu en algures, seguramente no territorio dos soños. Aos que se dedica con tanta forza que sempre queda tempo para agasallarnos aos demais. / José Miguel Giráldez