Un pracer inmenso: percorrer os lugares máis verdes de Compostela, coa Editorial Alvarellos

Sempre sentín unha fascinación especial polas guías. As guías de viaxes, de plantas, de flores, de obxectos diversos. Nisto un debe ser sempre un pouco borgiano. Borges amaba os libros de referencia, como é ben sabido, empezando pola Enciclopedia Británica. O pracer que se obtén dun dicionario ou unha guía ben editada paréceme inmenso. E sempre lembro as baldas das librarías londinienses, cheas de libros deste tipo. Aínda acabo de comprar hai uns días unha Guía dos paxaros de Irlanda, aínda que non practiquei nunca o bird-watching. A Editorial Alvarellos publicou hai unhas semanas unha guía excelente, realmente preciosa, dos lugares verdes da nosa cidade. É un libro marabilloso. E é verde en varios sentidos: non só fala de parques, árbores e flores, senón que está impreso en papel ecolóxico. E conta con 250 fotografías. O mellor do libro é que permite ir á realidade a comprobar todo o que di, que é moito. María Isabel Fraga, a directora do Museo de Historia Natural é a autora dos textos. Ademais da descrición dos entornos naturais de Santiago, o libro conta cunha guía botánica, e comentarios de 130 especies arbóreas. É un deses libros para gozar e para aprender. E para levar á rúa nos imprescindibles paseos pola fermosa cidade. / José Miguel A. Giráldez