Os diques flotantes teñen menor impacto sobre o fondo mariño

Son máis baratos e teñen un menor impacto sobre os fondos mariños. Os diques flotantes poden ser unha alternativa económica e sostible ás construcións de formigón que salpican a costa galega. Avaliar o seu comportamento e a viabilidade do seu uso nas nosas rías é o obxectivo que persegue un proxecto posto en marcha pola construtora galega Abeconsa e a Universidade da Coruña (UDC). Así o apuntou onte o director xerente de Abeconsa, José Luis Molina Botas, quen en compañía do director da investigación e profesor na Escola Superior de Enxeñería de Camiños, Canles e Portos, Enrique Pena se mostrou "encantado" de poder formar parte dun proxecto que cualificou de "moi interesante". Cun orzamento de 180.000 euros, o estudo tomará como referencia o dique flotante instalado na área náutica deportiva da Mariña na Coruña para analizar a súa resistencia á ondada e a súa estrutura hidráulica, ademais de profundar nas características da costa coruñesa e das demais costas galegas como escenario para a instalación de diques flotantes.

O proxecto contará cun grupo de traballo formado por un total de dez persoas, que durante os próximos sete meses, estudarán o comportamento do dique logo de "reproducilo a escala", e tras facerse cunha sonda 3D que se dese- ñou en Holanda e que, segundo Pena, permite "recrear a ondada que se dá no porto deportivo de Mariña da Coruña".