Martes 15.12.2009
|
Actualizado 13.25
Hemeroteca web
|
RSS
Portada » Hemeroteca web
POlémica
Os nomes ocultos
10.07.2009 A oito días de que se peche o prazo de presentación de candidaturas para o CGAC, a Consellería de Cultura segue sen facer público o xurado encargado da selección
MARÉ . SANTIAGO
 |
| Roberto Varela e Francisco López Rodríguez durante o seu encontro cos representantes de Anabad Galicia FOTO: Axencias |
A pesar de que outros museos con métodos de elección semellantes ao do galego antepuxeran a publicidade do xurado como unha norma de maior transparencia, o departamento de Roberto Varela parece que vai esgotar o tempo sen revelar quen serán os especialistas encargados de buscar a persoa e o proxecto idóneos para o CGAC, un centro marcado na súa historia pola intervención política en tempos do Goberno de Manuel Fraga Iribarne.
O día 16, xoves, é cando, segundo a orde publicada no Diario Oficial de Galicia (DOGA) conclúe o prazo de presentación. A partir de entón, quedará pouco máis dun mes para avaliar os proxectos presentados, xa que en setembro -anunciou o conselleiro- deberá saberse o nome do elixido ou elixida, un proceso que inclúe unha entrevista entre os finalistas. Polo medio, ademais, queda agosto, un mes tradicionalmente de vacacións.
Mentres, o CGAC segue sen un director á fronte despois de que a consellería cesase repentinamente a Manuel Olveira, un profesional ao que lle prometera continuidade até atoparlle un substituto. A escasa sintonía entre Olveira e Roberto Varela parece que foron o motivo da fulgurante destitución.
O impás afecta especialmente á preparación da próxima temporada, na que o centro debería cumprir as expectativas do Ano Santo, efeméride que atrae a Compostela miles de visitantes.
ENCONTRO
Varela promete para esta lexislatura a Lei de bibliotecas
O conselleiro de Cultura, Roberto Varela, e o director xeral de Promoción e Difusión da Cultura, Francisco López Rodríguez, recibiron onte os representantes da asociación de bibliotecarios e arquiveiros Anabad Galicia aos que lles comunicaron as liñas de traballo do departamento para conseguir un sistema de bibliotecas "moderno e integrado".
Neste sentido, Varela anunciou a presentación en 2010 dunha nova Lei de Bibliotecas na que se está a traballar na súa fase de borrador, coa finalidade de adecuar o marco normativo vixente desde 1989 ás novas necesidades do sector.
O conselleiro asegurou que manterá un "diálogo permanente con todos os profesionais, especialmente das bibliotecas públicas", para a elaboración dun plan e que estudarán as propostas presentadas de cara a deseñar unha "modernización eficaz" dos modelos de xestión, mantendo, e incrementando no posible, as liñas de axudas ás bibliotecas públicas.
Respecto á Biblioteca de Galicia, o conselleiro Roberto Varela confirmou a súa inauguración en 2010, coincidindo co Ano da Lectura, concibíndoa como "un proxecto para todos os galegos".
