A USC analiza o papel das científicas na astronomía

O ciclo de divulgación "Unha andaina pola Matemática" da Universidade de Santiago (USC) abordará na sesión de hoxe as particularidades do proxecto Ela é unha astrónoma, incluído no programa do Ano Internacional da Astronomía 2009.

A sesión do ciclo matemático celebrarase a partir das 17.00 horas na Aula Magna da Facultade de Matemáticas da Universidade de Santiago. A profesora do Departamento de Matemática Aplicada Josefina Ling explicará as actividades que se están desenvolvendo no marco deste programa a favor da visibilización das achegas de vida e de ciencia dalgunhas astrónomas excepcionais de diferentes épocas e países.

Así, a profesora Ling tratará de sintetizar como a astronomía moderna non se pode concibir sen o traballo realizado por todas as mulleres que transmitiron o seu legado.

V Curso de Primavera de Humanidades, en Lugo

O V Curso de Primavera da Facultade de Humanidades do campus de Lugo analizará entre hoxe e o venres a situación dos dereitos humanos dende unha perspectiva múltiple, nunha iniciativa enmarcada non programa de actividades de Lugo Cultural. O programa destas xornadas, que conta con 16 conferencias e varias actividades culturais, será presentado hoxe no acto inaugural na Escola de Formación de Profesorado de Lugo ás 19.00 horas.