A vía que une O Courel coa A-6: sete anos de obras sen fin

A Asociación SOS Courel acaban de denunciar a situación na que atopa a estrada que vai desde a serra lucense ata a autovía A6, xa que, segundo o colectivo, é vítima "dunha desfeita de obras que durará ata a eternidade".

A Deputación de Lugo fíxose cargo desta vía, que é a principal estrada do Courel(Seoane do Courel- Hospital do Cebreiro), cando, segundo o colectivo veciñal tiña que ser a Xunta de Galicia a que puxera medios e orzamento para facerse cargo da súa mellora. Así no ano 2003, ante a demanda do aumento do tráfico deste víal, a Deputación atreveuse a acometer as obras de mellora da estrada, cuns resultados, segundo SOS Courel, "catastróficos".

O colectivo asegura que sete anos despois de comezar estas obras, "só están rematados malamente 6 quilómetros dos 12 totais. Quédanlle outros sete anos mínimo". "Resulta unha media de menos dun quilómetro por ano", din indignados.

Afirman que o trazado resultante é "moi perigoso" e con "demasida pendente", xa que "non coincide co dos planos do proxecto".

A estrada debeu someterse sometida obrigatoriamente a un procedemento de Avaliación Ambiental por discorrer pola Rede Natura 2000, pero, segundo SOS Coruel, "non consta declaración de Impacto ambiental da Consellería de Medio Ambiente , nin medidas correctoras de ningún tipo". Así, aseguran que os prados de Pontalor foron tapados con cascallos e o río Vilela meteuse por un tubo escuro, na vez de habilitar unha ponte que ao mesmo tempo permitise o paso dos animais por debaixo.

Ademais, as obras "cortaron as antigas canles de regadío sen repoñelas e taparon todo de entullos, onde había prados verdes, hoxe non hai máis que cascallos".

Segundo o colectivo ambientalista, "os taludes e cascalleiras quedaron tal e como os deixaron as escavadoras, e así quedarán por centos de anos", ademais de que "non habilitaron nin un só paso de fauna regulamentario tal e como é perceptivo na lexislación ambiental vixente".

Ademais, desde SOS Courel consideran que nin sequera se respectou o patrimonio histórico. "O inventariado e arquifamoso conxunto histórico minero-romano da Toca foi atravesado" polo novo trazado da vía, "levando por diante o lavadoiro do mineral que había na milenaria explotación, sen que se informara a Dirección Xeral de Patrimonio da Consellería de Cultura da Xunta de Galicia e sen habilitar as pertinentes medidas correctoras".