A curta "Sen chumbo" de Jorge Saavedra triunfa no IV Festival de Cans

A curtametraxe de ficción Sen chumbo, de Jorge Saavedra, erixiuse como gañadora nas modalidades de mellor curta de ficción, mellor actor e mellor actriz no cuarta edición do Festival de Cans que se celebrou dende o día 24 ata onte no Porriño (Pontevedra).

Así, o xurado do Festival premiou Sen chumbo pola súa realización “moi sutil, que consegue contar os puntos de vista de moitos personaxes en pouco tempo”. Tamén valorou o “grande traballo” de montaxe da obra e os “espléndidos” actores da repartición coral.

En canto á galardoada como mellor actriz, Cristina Castaño, os membros do xurado indicaron que creou un personaxe “elegantemente malvado que lle proporciona un contrapunto” á historia.
Segundo engadiron, o premio ao mellor actor recaeu en Xulio Abonjo pola súa composición dun personaxe “no límite” que non obstante “non cae na caricatura”.

Grande éxito
Por outra banda, realizouse unha mención especial a As carreiras secretas de Antón Coucheiro ‘Cou’ xa que constitúe unha obra “moi fresca e moi ben resolta con poucos medios”.

O Festival de Cans, que durante estes días foi o epicentro da creación audiovisual en Galicia, tamén premiou Promesa de Fernando Cortizo como mellor curta de animación pola “complexidade” da súa historia.

O xurado do evento estivo composto pola actriz Mariana Carballal, os actores Víctor Fábregas, Víctor Mosquera, Manuel Manquiña e Javier Gutiérrez, a xornalista Mar Barros e o director Ramón Costafreda.
Segundo indicou a organización, o Festival de Cans concluíu con “grande éxito” de afluencia, sobre todo polo coloquio co actor e director de Pudor, Tristán Ulloa e polo concerto de The Turre’s Band.