A Compañía de Paulo Ribeiro, hoxe e mañá no Salón Teatro

O dueto de Paulo Ribeiro e Leonor Keil, nunha representación

O Salón Teatro de Santiago de Compostela acollerá hoxe xoves día 20 e mañá venres 21, ás 20.30 horas, dúas funcións de Malgré nous, nous ètions là (A pesar de nós, estabamos alá) , o último espectáculo da Compañía de Paulo Ribeiro que supón o regreso do coreógrafo portugués como bailarín. Ribeiro, ex colaborador do Ballet Gulbenkian e actual director do Teatro Viriato, en Viseu (Portugal), interpreta nesta ocasión xunto a Leonor Keil, un dueto sobre a intimidade e a complicidade da parella, sobre a alegría de vivir permanentemente en compañía.

Baseada en textos do Livro da Dança de Gonçalo M. Tavares, con música de Bernardo Sassetti, Gilbert Becaud e Bárbara Travadinha, a coreografía reflicte o conflito que se xera entre a figura totalmente feita para a danza de Leonor Keil e o corpo de Paulo Ribeiro, co que se comunica a dificultade de acompañar cos movementos a vontade do corazón de estar outra vez enriba do escenario. A interpretación non esquece a ironía e o humor sempre presentes no traballo do coreógrafo.

As entradas para asistir ás representacións de Malgré nous, nous ètions là poranse á venda no despacho de billetes do Salón Teatro desde dúas horas antes do comezo do espectáculo. Tamén poden adquirise xa no despacho electrónico a través do teléfono 902 43 44 43 ou da web www.caixagalicia.es. O prezo das localidades é de 10 euros (cun desconto do 40% para estudantes, xubilados, usuarios do carné xove e desempregados).

Natural de Lisboa, antes de afirmarse como coreógrafo Paulo Ribeiro fixo carreira como bailarín en varias compañías de Bélxica e Francia. A súa estrea no dominio da creación coreográfica foi en 1984, en París, no ámbito da compañía Stridanse, da que foi co fundador.